玩完成日廸士尼，攰到嘔泡，但係都第3日啦，又點會唔輪到王小姐的購物團正式開始丫!全day都係Shopping, Shopping and Shopping....
第一站係去涉谷，我都講過好多次啦，攰丫嘛，所以我地晏左起身，梳洗埋都成10點幾喇，酒店早餐無得食，就直頭坐車去涉谷食啦，不過都係食老麥咋喎，因為王小姐睇中左日本老麥一個用炸蝦做的漢堡飽，就去試下啦，ok好食啦。食飽就梗係行街啦，王小姐就走重遊舊公司GAP，我就去左adidas度睇嘢，之後就四圍行下，諗住去BEAM度睇下嘢啦，點Q知涉谷原本開左的5間唔同的BEAM SHOP，一次過執哂，問你死未?到左呢個地步，涉谷都不再係一個久留之地，行埋去老連咁遠的Buberry之後，走都走唔切咁，我地就去坐車去代官山喇!
坐車黎到代官山，梗係狂買正嘢啦，去到adidas 'style'度，王小姐就立即買左件恨左好耐的adidas的長身褸，我就正響度睇緊嘢的同時，無端端佢響度狂嗌我喎，心諗佢係咪又想問我"你覺得呢件好睇d定嗰件好睇d"之類的無聊問題時，原來係俾佢發現到我心愛的已故graffit大師-Keith Haring的T裇，咁就梗係唔洗講嘢就買啦，開心到爆，因為香港無得賣架喇!之後就梗係去埋APC同埋Porter啦，我見到有個Porter袋，boxer款，代官山限定，¥15620，照睇牌面係咪覺得必買無疑呢?但係點解又會無買呀?因為佢大大個字寫住"予約受付中"，頂!要訂喎.....我真係超鍾意架，難為王小姐仲響度操流利風涼話"好靚咩?咪又係袋一個，我覺得無乜特別咋喎!都唔靚!!......"，再去埋APC，成千蚊港紙一對普通到爆的白飯魚，大佬，唔好咁呃錢啦好嘛! 行完時裝，又輪到王小姐玩復古喇，去左代官山的"Mr. Friendly Store"，我嗰個Generation，又點會唔知Mr. Friendly係乜丫，佢響"Mr. Friendly Store"又再次滿載而歸咁走喇，到左呢個時候，晏晝2點幾喇喎，過去原宿把啦!
黎到原宿，必先經過成條好似女人街咁的直路，先可以正式踏足"裏原宿"，咁當然，人係總要食少少嘢架嘛，我地去買左嗰間成日都懶多人的pancake度買左個吞拿魚pancake，再去橫巷入面一間炸薯餅店買個唔知咩料的炸薯餅，就繼續行程喇，我再次使出奸計，叫佢去原宿一橦專賣女裝的商場度睇嘢，咁我梗係話"呢個女人地我實悶到爆架喎，不如咁啦，妳自己行住先，我去裏原宿行下，妳行完就打俾我，我即刻番黎接妳"，奸計果然得逞，咁我就bang一聲就衝入裏原宿啦，其實響呢幾日咁凍的天氣底下，由第一日開始我已經成日響度講"我想買頂笠住個頭同對耳的帽呀!!!"，但係行緊都睇唔啱款.....好在，響Stussy見到一款我好鍾意，咁王小姐又咁啱行完喇，咪問下佢意見囉，點知佢竟然話"你戴左之後，好似賊佬要去打劫咁喎!"，聽到呢個評語，我....頂.....唔住喇，唯有唔買囉，之後又去行埋Levi's同埋Dior，咁見到有玩具賣的KIDDY LAND，我又點會唔入去行個圈呢?就響呢個時候，王小姐的瞳孔突然放大數倍，原來係佢見到迎頭行過黎的一位女仕手拎一個大紙袋，個牌子正係佢最鍾意的GARCIA MARQUEZ GAUCHE，但係因為旅遊書都無講呢個牌子邊度有，所以無得去，但係我知道，佢係唔會咁易就收手架.......
行完原宿，就輪到新宿喇，王小姐一個箭步就去左"伊勢丹"度行喇，奈何我要扲住一袋二袋，我就去左Sakula行下啦，始終高科技同玩具先係我的最愛嘛!!王小姐花左大約個零鐘響"伊勢丹"之後，都係時候又黎個Dinner喇，今餐我地係揀左食壽司放題，間嘢叫"築地玉壽司"，d魚生又真係好鬼死新鮮囉，好正，但係我就俾d清酒差d攪掂左，因為王小姐嗰份.........我飲埋。
飽餐一頓，王小姐就湊住我呢個醉仙番去喇(但係所有購物袋仍然係我扲架，好難理解架!)，但係響途中，其實成街都係酒鬼，我地包括見到有個醉左的中坑同個廣告燈箱打車輪啦(當然個廣告張相係有個靚女啦)，同埋有個阿伯醉到當我地以為佢踎低響度休息下咁架姐，點之佢一企起身就原來條褲都未著好(即係個人企響度，但係條西褲響腳眼咁囉，咁當然，佢有著底褲....)，所以我仲可以扲住咁多個購物袋，響嗰度算係正常嗰批黎架喇!!!
相片重溫http://community.webshots.com/user/jasonwking
沒有留言:
發佈留言