為美味喝倒采

星期六食完晚飯，難得在家中欣賞電視節目，不看還好，一看就把幾火，若然大家有幸睇過無線在星期六晚上8點半，由周麗淇小姐及鄭嘉穎先生所主持的"為美味喝采"，必定有所感受吧!

節目一開始，司儀的衣著已出現極不協調的畫面，周小姐所穿的是一件背心連身裙，而鄭先生卻身穿皮褸一件，畫面就好像在同一地方同一時間，看見駱駝身旁站著一隻企鵝，此等奇景已教人一驚。再來佈景制作跟日本同類型節目"料理之達人"極為相似，心想雖然主持騎呢，但若然是抄橋節目，仍有一定可觀性吧!

誰知節目第一回合，由於當晚的主題是"辣"，竟然要求四位參賽者食完一碗以不同辣椒煮成的地獄拉麵，以測試他們對煮辣味餸菜的功力云云。看來真覺放肆，四位參賽者都是城中著名食府的大廚，要是質疑閣下烹調技巧，就問問他們的老闆，相信一所著名食府總不會找一個無甚本事的小混混來當他們的大廚吧?人家的出身就是一份最實在的履歷，這種侮辱對方智慧的做法，等於要任志剛先生在出任金管局主席前，要先來個"點現鈔"測試其對財富觸覺的敏銳度?還是"日本大胃王"小林尊先生就一定能做出最好吃的叉燒包，因為他能在12分鐘內狂吞100個?

再來兩位主持的表現同樣騎呢，周小姐在訪問正在炸食物的參賽者時，先來個狀甚可憐的表情，然後亦步亦趨地行到師傅身後，還不止，再以自以為很甜美的笑容開口說"師傅，我好驚d油彈到我呀!"，更將"綠豆粉"錯當成"薯仔粉"，他媽的在幹麼呢!!明顯周小姐極不尊重其作為廚藝節目的主持的身份，身為主持的責任，除要熟讀資料外，是近距離為觀眾介紹及訪問各參賽者在煮什麼呀?如何煮呀?煮的秘訣?何其美味之類的問題，而不是要位害怕爐火得差點要穿保護衣才敢主持節目的千金來呃飯食?再來鄭先生也好不了那裡，整晚節目全不投入，明顯照稿讀的他給人生硬感覺，要知道撰稿同事不會預先感受到當時環境的鑊氣、味道如何之類，但鄭先生只給一個反應"嘩，嗅到好辣呀!"，若然他能間歇來一兩次偷吃鑊中炒得熱辣辣的食物，才來得親切和真實，觀眾才會感受到那種令人難以忍口的美味吧!可惜，他就如一尊銅像般動也不動。

錯配主持已不是首次，正如"超級靚聲演鬥廳"找來伍衞國這位連唸台詞也經常口窒兼走音的"小生"來當司儀，証明無線不是無心之失，而是故意以此給各位街坊作為笑柄，籍以刺激收視而已。

2006澳門漫遊二之以和為貴

經過之前一晚的"猛獸表演"，第二日(15號)晨咁早9點幾一行人check out兼寄存行李後，就去刷番個早餐先，走左"盛記白粥"食，因為呢間嘢d粥好食囉，佢地煲的時候原來加左腐竹，所以個粥都零舍香同滑。食飽就起程去"媽祖文化村"，呢個地方我都未去過，地點係響路環一個老連咁遠的山上面，要先坐巴士再坐接駁van先去到，若然你自問好氣力都可以行上去(但我好肯定，係一定會後悔的)，坐van仔上到去，的確響澳門黎講，呢座建築物係有一定的可觀性，入面除左有供奉媽祖像外，另外亦劃出一空地俾旅人"燒炮仗"，對於王小姐連爐火都少tak的人黎講，燒炮仗就梗係未試過啦，佢又想玩下喎，20蚊雞一排，短到嘔，比起我哥姊細個響廣州玩嗰種成罐"七星伴月"咁大的爭好遠(雖然我從無玩過，只係見過)，當中過程可以響右手面個Media Player度有得揀番黎睇架。但呢度有個大問題係......好凍，等接駁van落山等左成個鐘都未有車(唔知關唔關食飯時間事啦...)，凍到個個都"0雪0雪聲"，最大鑊係當我同另一途人研究如何call的士落山的一刻，婆婆竟然唔小心踩到條水管跣左一下，好在後面有人扶一扶無跌低無受傷，但係就嚇親大家囉，但亦因為咁，當地一團專誠駕車黎拜神的一家人，見阿婆咁唔小心，仗義車我地落山喎，因為阿婆的唔小心，竟然令我地唔洗捱凍，都唔知係好彩定唔好彩喇。

返出市區，途經"媽閣廟"，經過無理由唔入去架，不敬嘛!一行人"媽閣廟"拜神，婆婆更迫令王小姐求籤(因為之前響"媽祖文化村"求的時候，整個過程因無阿婆的指導太過馬虎，再加上阿姨話呢間廟好，婆婆勒令重求!)，求得兩枝上籤，求乜就唔講喇，但係解簽阿伯的言論亦都非常到肉同準確，笑到我同婆婆non-stop呀。

之後再去食"黃枝記"，因為銅鑼灣嗰間執笠，要走返黎澳門先有得食，比起香港，始終本店先有最有水準。食飽就去"漁人碼頭"，老實講，呢度同"世界之窗"無乜分別，諗住佢會好靚，點知入到去，行哂得出的觀感都係"就係咁咋，唓~~~~"，係一個唔會令人想再去的地方，但係因為途中出現零散驟雨，所以入左去"金沙"避雨，而我對佢不嬲都無好感，因為"唔好黎"，去親金沙永遠都係輸，唔玩好過，繼續做保鑣反而來得清閒。

玩夠睇夠，去埋"鉅記"就走喇，不過響呢個行程的最終回就出現插曲，話說婆婆響門口等班女仕買手信的時候，婆婆不斷地叫人買d乜俾d其他無黎的外孫食，由於太亂同有d嘢賣哂，所以變左買唔到少少咁啦，婆婆就怪"有心就早早買左啦"之類的怨言，為左安撫婆婆，"大內侍衛兼任gag王"的我就當然出盡辦法，終於攪番掂婆婆的怨氣啦。返到香港都成12點喇，我地後生就無所謂啦，婆婆就辛苦喇，聽佢講番要嗰晚成1點幾先訓，佢話去飲都無咁夜呀!

縱然很晚，亦行了很多路，但眾人對婆婆的關愛而組發的"澳門漫遊"，每一人都感受到，那就是上一代最重視的"有心"了。

2006澳門漫遊

4月14日，同王小姐家人一行8人去澳門玩左2日1夜，因為要遷就王小姐婆婆的關係，行程絶不斷密，反而非常舒服，好玩!

當日坐10點半船出發，去到澳門落埋船去到關口就11點7，之後就出事喇，澳門關口大癱瘓，唔知係down電腦定乜鬼，d人完全唔郁，成團蛇餅活生生響眼前出現，因為係中國人的地方，秩序之"好"可想而知，大內侍衛"黃小堅"當然要保護婆婆的行動啦，其他同行人仕反正"你做初一我做十五"，迫下迫下攪到成12點半先出到關。

我地下榻響近碼頭的"皇家金堡酒店"，攪掂哂check-in的嘢就梗係食飯先啦，去澳門又點會唔食王小姐最愛的氹仔"誠昌"水蟹粥呢!因為復活節假期的關係，響澳門相信除左響條街食烟仔係唔洗排隊等位之外，應該係無一處地方食嘢係可以即刻入得唔洗等架，而我由於極度肚餓又有成棚女人要照顧，再加上出外旅遊有少少nature high，我響度狂"嗲"門口負責安排座位的大姐，阿姐可能心諗你條粉腸唔好響門口度攪攪震啦，佢又真係竟然俾我地入去先喎!(所以我經常話，我個Market係由2歲至90歲都有value架啦!)，點左多味好菜，當然有馳名的水蟹粥同鯪魚球啦。食飽飽行去對面"保健牛奶"食番個甜品"雙皮奶"，之後就行上去斜坡上的住宅博物館影下相，入得去就梗係要乖乖付出鈔票啦，婆婆響呢個時候又話唔好嘥錢喇，每位5蚊雞，有幾可成團人出黎玩丫，算啦，我地當然無理婆婆的告示照買飛啦，阿婆話唔好嘥錢，但係入到去最多偉論就係佢，因為佢睇番好多舊時的建築同衣著，極有共鳴，我就係咁響度影相囉，因為我響呢個團入面佔好重戲份，主演角色包括:大內侍衛、導遊、攝影師、跑腿、王小姐男友，友情客串"將食唔哂食物為左唔好嘥而照食埋的大胃王"(呢個角色一向做開，好考演技的，有大量內心戲......)等等... ...。

影相後差不多成4點幾5點，去得氹仔就梗係要食埋"大利來"豬扒包啦!唔係講笑，呢個豬扒包，話哂我去澳門的次數仲多過去柴灣，但係就無一次可以食到架喎，永遠係賣哂架，今次亦唔例外，但係王小姐就買"豬扒多"黎到瞞騙大家，雖然都好好食，其他人覺得好ok添，因為個"多"都真係幾香幾脆，但係以我個人黎講，佢出名係在於個"豬仔包"，而唔係塊豬扒嘛，豬扒包變豬扒多，即係我明明想要濱渏步，但係出黎係蔡依林咁囉。

離開氹仔，原本的行程係去媽祖文化村，但因為太遠同夜左少少，婆婆話天黑唔好入廟，所以改行程去"大三巴"影相，但係沿途再有奇遇，首先發現澳門竟然有以Benz V Class同埋Toyota Alphard黎做的Taxi，當我地嘖嘖稱奇的時候，報販哥哥仲好nice咁同我地講原來呢種係澳門新出的"多人的士"，只得30餘架，佢仲好有心問我地想去邊，教我地坐巴士，其實之前坐的士來氹仔的的士大佬都好似一個專業導遊咁，沿途話我地知呢度係邊嗰度係乜，搭車送導遊，抵到爛。

去到"大三巴"，先要經過"議事廳前地"，因為實在有d凍，眾人決定買風褸，而我就去左我最愛的"潘榮記"買金錢餅，但係由於時間太夜，又賣哂喇，一行人上"大三巴"影相留念，婆婆又再發揮長者本色，沿途見到有間"大聲公涼茶"，迫令各人乖乖灌下一大碗，而我就因為唔飲得涼茶而免疫。

為免行程太密令婆婆辛苦，行完大三巴就去"海灣餐廳"食飯，呢間真係超好食，環境又好，我同王小姐去澳門的必到食店，因為今餐由我埋單的關係，王小姐事無忌憚地狂點食物，仲叫埋佢想食好耐的血鴨。就響呢個時候，我見VIP房入面行左個好熟面口的師奶出黎，原來係翁靜晶(唔化粧唔著律師袍，佢同普通師奶根本無分別)，佢同劉家良師傅一家十幾人食飯，但係佢兩個女就唔得喇，後生女攪到個樣成個Nana咁，唔知以為未訓醒咋陰公，不過師傅即係師傅，一般人食飯就通常係簽咭架姐，劉師傅就係"簽單"喎，問你怕未。講番我地，所有食物都好好食，就連婆婆呢個食慣住家菜的都話掂，一行人捧住個大肚子離開，護送婆婆番去之後，就輪到澳門猛獸表演"老虎乸大鬥老虎機"喇!

送左婆婆返酒店休息，我同王小姐、佢表姐、姨媽，休息一陣梳洗埋就落去酒店內的娛樂場玩喇(要正規d叫"娛樂場"，"賭場"太out喇)，但係因為呢個場無"老虎機"，而我隻"老虎乸"就只係識跟同類"老虎機"玩的原因，咁無同類佢又點會滿意呢，所以轉場去對面的"金龍娛樂場"玩，而我又因為害怕"老虎乸"的關係，所以我對"老虎機"亦都無甚興趣，全程只係陪玩，反而佢地三個女人就玩得不知幾咁開心，由半夜12點玩到成3點幾先返酒店添呀!

霉氣管

今日天氣急降，由昨天的29度下跌至19度，溫差教小弟那條已霉得很的氣管大喊救命。一早醒來已心知不妙，呼吸困難得有如大石壓胸，逞強上班，但表現有如業餘選手完成馬拉松長跑，氣喘如牛，大歎辛苦!

近日香港"勁爆"，先有東京街"日軍炸彈"，緊接牛頭角"煤氣爆炸"，剛巧"日軍炸彈"發現當日(4月8日)，我由長沙灣出發到葵芳出席姨甥彌月，臨近地鐵站口，發現一大團人在馬路前看熱鬧並見警察全面封路，心想"係咪車死人呀?咁多人睇?"，我一向對"沿途八卦"全無興趣，關心的只是正趕時間的我應往那個站口，沿途在對面馬路見拆彈專家身穿我求學時的同款"蛤蜊衣"，將一條條像泰國食品"貓屎"般的炸彈搬離現場的奇觀，但亦不及圍觀街坊的七咀八舌來得精采，難以理解張三李四所看為何?我斷言十之有五都暗叫來個"突然爆炸"，好讓他們可在明天早茶向友人描述目擊情況，大吹一番，但爆炸力亦要恰到好處，絶不可傷及其萬金之軀!因對方只想八卦，從不想過有任何損失，又怕死又要八，誰知爆炸威力是何等級別?要不然來個核爆蘑菇雲，炸你班三姑八婆個稀巴爛好了。

在重新包裝的一天蒸發

經市場研究發現，此Blog的Background Music推出以來，得到猶如往年要求董先生下台一樣的熱熾聲音，為順應民意，即日撤銷Background Music所有職務，另共犯"Message Board"亦因終日無所事事浪費公帑而於嚴重影響此Blog連線速度，亦由即日起革職查辦，欽此。

[路邊社新聞]雖然"KinVoice"持牌人權衡各方勢力下撤銷Background Music所有職務，但持牌人黃先生向本社透露，有關方面無損他對音樂的熱誠，刻下正進行Audio Blog測試工作，日後可能會於部份文章內加tunner一併發放，隨讀者意願選擇是否播放音樂，既可充足他本人對音樂的私慾，亦可照顧因誤墮其Blog而自動播放音樂的讀者出現"關掉也來不及"的苦況。有進一步消息，本社將作第一時間報導。

在重新包裝的一天出發

為完滿blog的充實度，經過一番鑽研，終於安裝左Multimedia Player，再加上早前的hit counter，但如此小兒科又點夠皮?之後就再整多個message board落去(雖然明知無人會用，但係照裝可也，問你怕未?)，但係又諗下諗下，不如整段 background music上去啦，到最後就得出而家呢個制成品喇，個Multimedia Player我會不定期咁update，呢個player我覺得幾好架，有得放歌放相放短片，暫時短片方面有Tokyo Disneyland的表演"Minnie!oh!Minnie"，遲d會再拍一d或者搵一d我覺得"正"的片放落去架!

至於個Background Music<男子組>，我覺得呢首歌真係幾好聽的，再加上近日一些事情，令我對此歌更有感受。(本網頁底有個tunner可將音樂關上，敬請留意!)

其實之前提過，"What can I say?"的名稱係源於我初寫此誌時候純屬無題故名之，但經個多月的試業，此誌實為我生活點滴及對事物見解的一個意見發表平台，所以由今日起，"What can I say?"將正式易名為"KinVoice"，即"堅的聲音"，我的聲音，在重新包裝的一天出發!!!!

舊朋友~~~心緊扣~~~

清明節，放假一天，當然要抱頭大睡啦，訓到差唔多一點鐘，就開始我今日的任務"陪伴王小姐"喇，坐巴士去銅鑼灣接番整完頭髮的她，當我正欲再小睡片刻，赫然發現有位女子上來上層，沿途我與她四目交投3秒，對方一臉疑惑眼神，響呢3秒，我諗"呢位女子係咁同我鬥啤，我一定識佢架，但係又唔係成日見到的，係咪朋友的女友呢?"，點知就被對方先發制人一句"咦!又會響度見到你呀?"，聽到聲就記得佢地就係舊同事Cindy及阿儀!條衰妹弄得一把直髮，真係唔認得呀!比起以前又靚左啦!但係阿儀就可能已嫁為人婦，所以就........，原來兩位婆仔特登出旺角行街shopping，重遇兩位好朋友，當然如立法局會議一般，大肆吹水一番啦!大樂也!!

別過兩位"美女"，接過王小姐去行下嬰兒用品，看看有無產品買俾姨甥女玩，奈何毫無收獲，轉落SOGO超市逛逛再打道回府，誰知咁都有新發現(可能係小弟大鄉里而已)，原來而家唔洗蒲Sugar、喜喜，都可以隨街飲shooter、cocktail，上圖的產品叫做"Vodka Twistee"，撕下蓋，張口一吞，整杯下肚，但反過來一想，樂趣何在呢?所謂玩得盡興，良朋共聚，加點酒精令各人更為hyper，從而天南地北談個痛快，人間美事於"有山有水再加酒水又有女"，但總不致於走在街上豪吞Vodka三大杯，此地乃非俄國，酒滿胃暖此等籍口派不上用場吧?

最佳損友

如非"九工校友"，定必對本文全無投入感，如感疑惑敬請中途離場。

近日看藍毛的Blog，得知早年的"史上大戰"再聞風吹草動，對此敏感話題，小弟實不便發表任何意見，畢竟兩邊皆友，早前於藍毛的Blog留點愚見，為免再於別人地盤生事，既然此地乃屬小弟"堂口"，難奈想發表一番個人見解，反正"本日誌只反映日誌撰寫人及個別參與人士之個人意見"吧!

彼此朋友間十多年友情，擦也擦不掉，畢竟非血海深仇，作為壁上觀，總希望雙方可以和解。俗語有話"咁多年喇，佢不嬲都係咁架啦!"，但此話的潛台詞，其實亦為"咁多年啦，佢唔係咁吓嘩?"，身處方位不同，自有不同觀感，我理解"受害團體"對"億萬少年"的失望，亦相信"億萬少年"對其"自我行為"有所覺悟。正如藍毛所言，"億萬少年"行為罪不致死，但其每每令人失望的行為，亦叫想行前一步的朋友卻步。在此祝願各舊友快快樂樂。

近年發覺人生苦短，想過得快樂一點，蔡瀾教誨"待人相處"的一句話，銘記至今，「朋友對自己友善時，要用十倍的友善奉還；但當自己不受尊重或令自己不快時，不需惡言相向，只管十字真言，"不能陪君子作無益語也"，以俗語解話"都費事啋你條XX"，人生將會快活一點。」

勁GAME推介

我的好友"銅鑼灣最Top的Art Director"周公子，尋日醒左個好game俾我玩，條link係http://www.foon.co.uk/farcade/hapland3/，據周公子的引述個game的玩法，就係根據住個game入面可以俾你click得的嘢的變化，串連成一個故事，個故事內容同結局無人知係乜，靠諗頭靠創意自己一手一腳攪掂，舉個例(呢個亦係周公子對我"舉起"的例黎架)，畫面右手面棵樹頂的樹葉你一click佢，就會跌個"土制菠蘿"炸個地下的，但係其實若然響個菠蘿跌落黎嗰時你又click吓下面枝樹枝，個菠蘿又會彈去第二面唔係跌落地架喎。若然發覺按錯掣，係可以按番畫面右下的reset制去重新黎過的。就係以呢種玩法，去構成一個故事喇，呢個已經係第3集喇，想玩番第1同2集，可以響個網頁入面最底有得click入去玩 Series 1 or 2的。

周公子謙稱玩左成個月都未破到呢關，走黎叫我一齊玩，我問佢"你叫我玩，係咪因為覺得我好乸醒可以幫到你呢?"，對方無言..........

大家一齊諗吓啦，我玩過真係幾好玩架，而大家如果發現到任何奇特的發現，記得留個comment喎，可能就咁就串到個故事架喇!