周慧敏Back For Love演唱會

近排我個Blog似專欄多過似日誌，為怕悶親大家，講番個生活小記俾大家聽下啦。

話說王小姐早前已經係咁扭話要去睇「周慧敏演唱會」架喇，咁又見咁耐無乜睇過演唱會，而周慧敏又好似收山咁(雖然退出可以復出，復出後又可以退出咁，但係都無法啦.....)，就去左買飛睇啦，尋晚就一如以往地所採取買「即場飛」政策，因為我地多年都係咁買飛法，而每次都可以成功買到最少頭十行，甚至乎第一二行都試過添，從未試過空手而回，好過晨早打去信用咭訂飛打到天黑先打通啦，仲要唔知幾多行嘢位置.....，而我今次就6點半去到紅館個counter度諗住買飛.....
我 : 想買今晚周慧敏，400蚊
售票阿姐 : 無喇喎，400同300得番單丁位，200先有連位
當時我心諗仆街喇，唔通老貓燒鬚無得睇? 就響呢個時候，一位「鬼鬼鼠鼠食蕃薯」的師奶就響離我4個身位細細聲咁叫我....
鬼鼠人 : 你係咪要飛呀?我有喎!
我 : .........
其實當時個環境好特殊，畫面就好似電影橋段，街口樓梯有個阿姐向個阿叔拋媚眼，個阿叔想上又唔想上嗰種咁，但到最後，個阿叔梗係有上啦....
我 : 妳有飛呀?我想要400喎，咩段數咩行數先 (好在以前有去下大陸，先有嗰種識途老馬feel)
鬼鼠人 : 400，梗有啦(攞張飛出黎話俾我聽係邊段邊行，仲帶埋我去counter個setting plan度指俾我睇我坐邊添)
我 : 咁幾錢先? (明知係黃牛，梗係問清楚價錢啦)
鬼鼠人 : 就原價400蚊之嘛!
其實響同一時間，話哂都叫做緊d好似唔見得光的嘢，我緊係四圍望下有無嘢風吹草動啦，鬼知陣間會唔會好似電影橋段咁，一接張飛就跑幾十個CID出黎制服我，又或者有班Bunny Girl走出黎話係電視台偷拍叫我講感受，咁就樣衰啦，但我所見到的反而係另一個世界，我當時應該係活響「大白鯊」的劇情入面，因為當「鬼鼠人」同我對緊座位，我見到附近已經有幾條個神態同「鬼鼠人」非常相似而又都係帶住個小腰包的茂利，眼甘甘咁望實我地，就好似我地如果談判失敗的話，就會再有另一條游埋黎咁，個畫面真係相當抵死架! 而我都費事再攪咁多嘢喇，第9行，算係咁啦，一手交錢一手交貨，過程簡單，但係之後唔過3分鐘我擰番轉頭望，就已經唔見左個「鬼鼠人」喇，當時其實我都心諗「阿婆走得快，一定有古怪」，張飛會唔會係假架?(唔係三國演義個「張飛」，I mean "the ticket")，票面係用Master Card買架喎，會唔會其實係一張失飛，而當時人又補領番，咁我張飛咪無效囉?(凡所有以VISA同MASTER買的飛，不論係演唱會定戲飛，若然唔見左，係可以用張Card去Counter補領的，所以有時雖然用Card買飛要收手續費，但真係有個保障嘛)，但係我都唔理得咁多喇，應該唔會咁黑仔卦?

咁我同王小姐響「都會廣場」食完飯(原來而家響呢度大部份餐廳食飯只要有演唱會飛，都會有9折架喎)，就響我地沿天橋行去紅館準備入場，我見到地下有兩張飛喎，仲要係未"meet"的飛喎，王小姐第一時間就梗係叫我執起睇下係咩日子第幾行啦，睇過係當日的200蚊飛，廿零行，王小姐見無Jetso就叫我放番響地(因為呢套飛係用VISA買，鑑於上文的原因，費事麻煩，如果係用Cash買，第一時間搵朋友飛的士黎睇益下人都好啦)，但我一來費事俾人以為我亂拋垃圾，二來正義感突然勁澎湃，我就攞番套飛去紅館個售票處話有人唔見飛等下有無人黎認領啦，點知個職員可能未見過有人會攞番去咁，好愕然咁講左句「唔......得架喇」，唔通香港真係無人會做番d應該要做的事喇咩?

講番演唱會，當晚嘉賓有林子祥、林隆漩、邰正宵、黃凱芹、古巨基，表演得最精彩都算係林子祥喇，真係有明星嗰種明星風範兼壓場feel，同周慧敏合唱"Sometime when we touch"超正，再獨唱「分分鐘需要你」又好好聽，咁其他嘉賓都有水準，不過拍埋林子祥就真係爭好遠喇；演唱會rundown係周慧敏獨唱一首，嘉賓合唱一首，嘉賓再獨唱一首(周慧敏換衫)，大部份人的廁所位竟然係響林隆漩獨唱期間，可能佢響香港知名度唔高啦，但係若然係我，梗係響邰正宵嗰時先去啦，林隆漩一定好聽過佢先嘛；主角周慧敏就真係正喇，話哂人家都差不多四張嘢，雖然佢無再好似後生嗰時咁「唧」個胸出黎，但係個樣都仲keep得好好，嗰種斯文賢淑女人feel又出哂黎，唱歌方面其實佢又真係無乜金曲囉，咪又係「天荒愛未老」、「感情的分禮」同埋「自作多情」嗰幾味，但上一代的玉女的確係好過而家嗰d明星妹好多啦，，話之影到妳同d男人攬埋一舊或者擔住枝煙響度爆粗都好，總之身份証寫住係Female的都話係玉女，認真吹脹。

今晚除左滿足左王小姐勁想睇周慧敏的心願之外，我又何嘗唔係回味番以前迷偶像嗰種feel，試問響90年代頭的青春男生，有邊一個無迷過周慧敏同埋楊采妮? (情迷葉玉卿的色慾少年除外......)，同王小姐黎左個會後檢討，都係發覺女人唔keep好易無，之後有呢一段對話.....
我 : 佢真係幾正呀呵
王小姐 : 係呀，你講到佢咁正，我諗我都要留番長頭髮先得
我 : (少少側目)我一早叫妳留長髮架啦，係妳自己成日抗旨走去攪花臣之嘛，若然妳到人家個年紀都仲係咁正，我到時咪無籍口去「沙沙滾」囉
王小姐 : (反擊性的高音語調)你可以要我唔駛做，印印腳養生，咁我實有咁正架!
我 : 都話妳唔識計數架啦，若然我一早可以要妳唔駛做，我晨早就可以「沙沙滾」啦，洗啋妳咩，哈哈!!
王小姐 : .......你都痴線架.......

巴士躁漢大勝東亞懦夫

「巴士阿伯」網絡短片熱爆全城，截至今日為止已有超過三百萬人次瀏覽，若以環保團體「綠色和平」慣用的什麼招股書用紙厚度比3幢IFC還要高的誇張比喻法，瀏覧人次之多等同在紅館開了300場演唱會，亦可以是澳門總人口的約6倍之多，可想而知，近至身邊的同事，遠至紐約唐人街的ABC，對於「巴士阿伯」必有所聞。

短片最初的名字無記錯應該是「阿叔鬧爆巴士少年(聲音激似林尚義)」，焦點是集中於這位仿製「阿叔」配以極似足球評述員「阿叔」林尚義的聲音，大家所期待的其實是有位「阿叔」把聲似「阿叔」，而不是片中對話內容。但不出一個星期，這位「阿叔」已經紅起來，標題那句「聲音激似林尚義」不再出現，正如吳浩康現在也沒有人叫他做「翻版陳奕迅」一樣，「巴士阿伯」已變成獨當一面的超級巨星。 (當然，兩者的知名度有天壤之別，「巴士阿伯」就比吳浩康更紅，除非是爆出「吳浩康情慾短片」，否則他就是沒有300萬的支持度)

先撇開在狂X少年娘親那段粗口亂飛內容，相信最為人津味的那段「未解決!!!未解決!!!未解決!!!」和「你有壓力我有壓力」，短片的走紅原因亦正是這兩句所成；他的「未解決!!!未解決!!!未解決!!!」就是惹笑成份居多，但另一句「你有壓力我有壓力」就沒有說錯，就是香港人「個個都有壓力」，所以最獲得大家共鳴，亦是片段能廣泛流傳的主因，若然「巴士阿伯」沒有這精警對白，就肯定沒有這麼多人的瀏覧，正如好年前有一粗口大叔打電話到國泰服務熱線以無理取鬧地狂X服務員十分鐘的錄音聲帶，一樣在網絡流傳過，但只是爆粗一味狂X而內容空洞，在網絡世界就不會爭到一點席位。

現在事情最新發展是戰情由網絡世界已轉戰大氣電波再進軍國際，多個電台節目議論紛紛，前天更有自稱就是片中那位受害人「少年」Elvin，打電話上商台表示自己不是怕事而處於下風，而是正在「耍」阿伯要他出醜，又反問大眾是否有同樣勇氣告誡阿伯，更深層次地其實是要表達一種反智思想提醒香港人就是這副賴皮德性云云，聽罷只有乾笑三聲，明顯此人說話未經大腦，難怪會被「阿伯」殺得如山倒，何謂「耍」阿伯、有勇氣、「提醒香港人就是這副賴皮德性」，請不要像成龍大哥攪大人家肚皮後告訴全球人類「我犯了係男人都係犯的錯」的拉人下馬，難道「少年」一早就知道在暗角處有人舉機攝錄再發布全球，所以一派90年代周星馳式的大演賴皮，以告誡港人要自強而別做東亞懦夫? 說他在 「耍」阿伯，從任何角度看，Elvin老弟都處於被動角色的老鼠拉龜，又何「耍」之理? 所謂的勇氣，根本他倆都是欺善怕惡之流，若然對方是手臂粗如大脾的肌肉男，Elvin老弟又可敢輕拍對方? 而阿伯又會否反過來有這麼多問題未解決呢? 又有華文報章訪問他大談感受，老弟再次告誡港人要「學他這麼忍讓，只像阿伯那樣躁狂」，我同意阿伯表現不值參考，但老弟的表現更教人不愖，老弟的文化水平明顯不合格，忍讓跟退縮就有著兩碼子的分別，舉個例子，現今中國對台灣的政策就是忍讓，以往中國被列強瓜分的態度就是退縮，明明人家有錯在先但反被人踩到上心口連娘親都攞上檯也不出手，那跟割地賠款有何分別?那樣都還是叫忍讓而非退縮?老弟就連簡單的層次分析都攪不清，何以有能力教導香港人呢? 若港人真以此為學習對象，香港將離淪陷不遠已。

以我推斷，劇本就是Elvin老弟見阿伯大聲講電話後，心存傲氣想為香港的和諧社會出一分力，殊不知被對方氣焰反噬，先輸一仗改稱對方「老闆」，同時又發揮香港仔靈活走位的機靈特性，當阿伯話算數握手又串爆地唔握，但轉頭又向對方恭敬說話，情緒波幅對心臟負荷極大，回家心想一切還好當無事發生，冷不防已有情報人員在暗角設鏡攝下自己的出色表現而搬上互聯網公諸同好，返公司先被人笑到面黃，回家更有無面目見娘親，所以要借大氣電波來一個絶地反擊，只可惜換來更大笑柄。

其實應對策略可以好簡單，一當無事發生，從不干預阿伯的高頻音波，乖乖的坐巴士回家做一位沉默中國人；二要是像Elvin老弟般叫停對方，阿伯要是持續大聲反罵，老弟此時企直身子(其實只是要走往下層)，阿伯肯定以為老弟要出手而後退一步，氣勢可先勝一仗，繼而行出走廊往下層時，以阿伯的亢奮情緒必定出手阻攔，到時老弟就可發力「質」他一拳，鬧上法院以「對方先行出手而為保人身安全作出適當自衞」為抗辯理由，附以乘客作證阿伯情緒開始進入野獸狀態呈現失常，審訊結果也未必會輸，起碼總叫為民除害，比現在給300萬人恥笑來得留下一點顏面。

而當大家在短片中看到「巴士阿伯」和「少年」之外，又有否留意到鏡頭外的其他乘客?正如Elvin老弟感人肺腑表示「俾着係大家又會點做丫」，易地而處，相信大部份人都會選擇做沉默羔羊在場外欣賞世紀大戰而絶不插手，但大家也不要慚愧，因為人類社會就是這樣的荒唐，記得英國電視台曾做一項測試，找一年約40的女仕作狀暈在人流極多的街上超過20分鐘，街上途人邊行邊看，但就無一上前查看她是死了還是暈了，直到另一臨時演員扮作熱心途人上前照顧，其他途人才紛紛出手相救，就這個案的心理研究表示，在臨時演員未出場前，因為大多數途人都落入「我去幫他?但其他人都無幫，還是等下位有心人吧」這個由多數人組成的族群之內，人的特性就在於無人會願意衝破族群壓力突圍去做第一位先鋒，因為分分鐘可能只得自己一個彈出，孤掌難鳴，並形成與整個族群對敵的劣勢，所以萬萬不會犯險，就因為這種人的根本心理，所以老婦隨時「死左都無人理」，但只要有人願意做第一位出手的人，情況將完全改變，畢竟人間有情，因為族群內那種「得我一個出手?」的心態不再存在，人們將會放心由「不去幫他」轉投「去幫他」的族群之中。同樣的個案，當時其他乘客的態度就是一副「關我Q事」的樣子，但若然巴士上求其多一位熱心市民附一句「x你咩!阿叔，收皮啦」，真理在於阿叔有錯在先，我肯定巴士上其他乘客的態度將會出現極大變化，定必加以附和圍剿阿叔，Elvin老弟也不用如此屈屈而不得志。

阿叔和Elvin老弟就為全港市民來了一課很好的通識教育，話至此已無言，齊來為香港的新一代默哀一分鐘。

港股不可搏估

對 沖 基 金 鋪 排 了 半 年 升 市 後 ， 終 於 食 糊 ， 近 日 密 密 沽 貨 獲 利 ， 首 當 其 衝 是 金 銀 銅 等 商 品 期 貨 。 倫 敦 金 銀 銅 價 上 周 五 急 挫 ， 且 沒 有 止 瀉 象 ， 觸 發 相 關 股 份 昨 日 全 面 下 挫 ， 食 糊 及 斬 倉 盤 湧 現 ， 港 股 大 受 打 擊 ， 散 戶 走 避 不 及 被 害 死 。


上文節錄自今日蘋果日報A1頭版，我對於當中那句「散戶走避不及被害死」大為心痛。何謂害死，以我理解，死者在毫不知情的情況下被人設局加害，死者必屬無辜或有莫大冤情者，才可以叫做"被害死"，但近兩個月進場散戶人數之多已無法理解，但入場後的策略就如自由行剛進廸士尼樂園一樣，先選比較多人玩的設施，例如:匯豐、長江等大籃籌，若然太多人排隊輪候，就轉玩較少人的設施，例如:二/三線股，總之有理無理，入得場就不會空手而回，一定要玩到為止，到頭來現在"機件"因太多遊人使用關係，需要停一停機以作"適當調整"時，這班打死也不願離座的"橫行蟹"卻在場邊因停機的"震動"在嘔吐大作，同時又臭罵"操作人員"為何停機而"害"他們大嘔一場。

我對市場的分析一向"親疏有別"，堅持只供極要好朋友或家人的"獨家下載"，今次可就是我唯一一次不計親疏跟大家講股，原因很簡單，就是A1版的那句"害死散戶"而令我有感而發，股票有賺有損的金科玉律無人不曉，但早陣子熱熾的炒風明顯燒熟了散戶那一丁點冷靜的心，大家印象當中，有看過一幅走勢圖上的軌道直得像間尺一樣嗎?從來所有金融產品的軌道都是呈波浪形一級級有升有降地向上或下行走的，就正如樓梯一樣，總需提腿放腿才可形成動力，但就從來無人意識到這一點，只知道不停升的時候，不買就呻笨，結果在回落時就變成炮灰。賺錢時買樓買車無人講，現在跌市就個個大喊被害死，這種"輸打贏收"的心態在投資市場永遠要不得，罪行等同那些永遠只會馬後炮的"早知遲d買/賣就仲賺得多啦"的八婆師奶一樣，需要拉去思想教育一番。大家有時間去黑口灰面地抱怨跌市，然後睇電視什麼講股騷聽一班分析員的個人偉論來學炒股，不如自己學習如何在股海自救，自學睇圖找支持阻力位，再留意市場動向，大家可知分析員在計算同一隻股票，以A方法計出是"升"的結果，其實又可以用B方法但卻計出可以是"跌"的結果，那你又會問，分析員如何取決是升還是跌呀，好簡單，就如時裝設計師一樣，當全世界都話今年興粉紅色加波波花點，就不會出現一位見解獨到的Designer表示今年興玩黑沉死人彊屍Look，早一兩個月，你聽到有一位分析員會告訴你個市會跌，小心"被害死"嗎?另外，大家又會否留意一隻股票被散戶壹兩千股拋售慢慢一個個價位地閹乾， 跟被大戶一"球""球"地鋤低幾個價位，兩種方式都係跌4個價位，但看法就是可以各走兩端，但羊生羊太們，你又有無留意這些?

其實股票遊戲屬願者上釣，所謂"大漲小回，不可不回"，可以肯定，香港幾千隻股，就算"股壇如來佛"淥縮，又或者其他乜sir乜生，都係無可能全部熟讀睇得哂，自己專心研究某一兩隻股票的價位走勢及動向，總好過打電話上電視節目問"阿乜生呀，我隻嘢響呢個位入，應該幾時放呀?"，我入行期間跟過多位師傅，其中一位跟我說過「股票市場等同一個特大的賭場，只不過比起買大小多了一點點的實質數據支持，但到最後我們進場的人就只會是"閒"，在背後打骰操盤的那個"莊"，才會是贏錢最多的那個，想在這個賭場上贏錢，就要學習如何"見好就收"」，這句話，大家理解到嗎? 祝大家旗開得勝。

捐血救人，唔會頭暈

今日紅十字會黎到公司攪捐血活動，我呢d曾經受惠於血庫的人，當然要鼎力支持啦!!

其實早前我都收到紅十字會的email，話嗰時缺少A型血而叫我去捐，但係佢所列出的時間就相當唔方便，辦公時間兼仲要響銅鑼灣，我呢種收工只想即刻返屋企的人，又真係無乜動力特登坐車走去捐囉，今次就唔同喇，響公司頂樓，咁都唔去就真係過唔到自己嗰關囉!!

但係到捐血就真係好多人生百態，包括呢個世界實在太多人怕見血而唔敢捐啦；到敢捐嗰班，原來又有好多人係要打麻醉針得架，我又唔明喇，係唔係都要打枝針落去架啦，雖然捐血嗰枝好似粗碌少少，但係打埋麻醉針咪變左打成兩枝針先捐到血囉，同埋以我呢個豐富麻醉臨床經驗的人黎講，除非真係全身麻醉，所謂局部麻醉的效果，並唔會如想像中"一D都唔痛"咁理想的；亦有第一次捐血的人要影相留念啦，仲有人捐完之後好似玩完過山車咁要呆坐一邊休息，總之呢個世界就乜人都有啦!!

世界兒童基金會

話說早兩三星期前，我接到匿名電話，對方以菲律賓口音式的英語(當中絶無貶意，只希望讀者能清楚感受)表示有封信需寄給我，但以原地址寄出後打回頭，要求我給她一個新地址，我多番追問她都不回應她的身份，我決定給她公司地址作罷，反正這裏長期有保安，怕妳有牙嗎?就看看妳有什麼寄給我。

正當我早已忘記這件事時，今天竟然收到一封「世界兒童基金會」的信，內容大致上表示該團體有一「春蕾計劃」旨在協助中國內偏遠農村的兒童脫離貧困，得以溫飽及接受教育，重建自信生命，能為中國的新生代提供更美好生活，以免禍延下一代。

我已記不起跟這個團體的結緣從何而起了，我有少少印象好像在獨居屯門做隱蔽少年時曾經愛心澎湃地捐過錢給他，但問題重點不在於此，在看到這封信之前，圖中金光閃閃印有我名字及地址的貼紙才是信中精妙所在，兩張大及廿四小張小(其中十二張小相同無scan，而我的名字及公司樓層數字，因本誌可從Google等搜尋引擎找到，基於私隱理由，數字已用電腦刪除了)，設計得非常精緻，絶對適合私人及商務用途，但問題正正出現眼前，這張貼紙設計、排版、印製的成本，又以熨金印製，應該不屬便宜貨色，若源於一間公司為爭取訂單以討好老闆，交出一點"心意"以希望洽成生意，實屬正常，但一所志願慈善團體，花這點錢在這方面，我不太苟同了，我收到這信有一個「為何浪費金錢在這貼紙上?用這筆印刷費放回在兒童身上，只簡單地寄上一封慕捐信，不是更好嗎?」，我的反應只是不高興，而我對該團體的感覺亦只有質疑。

我不是質疑他們對善心，我最怕他們就是好像公益金一般，花太多無謂金錢在行政管理宣傳雜項等之上，捐出的十元，竟然可能有六元用於"成本"，那如零錢般的四元才真正去到有需要人仕手上，那我捐出來的十元，不是"事與願違"了嗎?

或許是我想壞心腸，這張熨金貼紙，令我想起以往大陸高官用善款大擦魚翅鮑魚，可憐山區小童則在吃發霉蘋果。雖然兩者性質各異，但奇怪的念頭，卻令我對這個"春蕾計劃"有所卻步。

本誌只屬個人意見，如各位對是次計劃有興趣，可到http://www.worldchildrensfund.org.hk/瀏覽。

新城原聚力音樂會

早幾日受到同事誠邀陪佢去睇由新城電台響會展攪的<新城原聚力音樂會>，表演嘉賓有Stephy，王宛之、衛蘭、衛詩、側田、Soler、梁漢文同何韻詩。

睇show前就梗係要食嘢啦，去左灣仔<永華麵家>食"竹昇麵"，又真係幾好食喎，不過我都係鍾意食<黃枝記>多d，不過執哂番澳門喇............

至於個show就一般啦，最好睇都係側田，衛蘭同梁漢文，何韻詩可能因為病啦，真係無乜水準囉，王宛之就真係把聲的問題，佢把聲係靚，但係太細聲喇，真係完全聽唔到佢唱乜囉，其他人? 無謂提啦!!

但我想講的唔係台上的表演，而係台下的演出比台上更盡情，可能我真係太耐無睇show喇，各fans用光管砌出歌手的名字兼大聲呼喊，最抵死就係佢地唔係睇整個show的，當個歌手表演完畢後，佢地就會即走架喇喎，嗰排椅就會空哂，好得意架，佢地真係好專一囉，係睇嗰個就嗰個，就好似樹熊只叫某幾種尤加利樹葉，若然食哂，佢地情願餓死都唔會食其他嘢，呢種專一情操，竟然響香港的fans體內找到，難得難得。

另一奇景就係坐響我身後的一班妹妹仔，文革歷史又唔見佢地背得咁叻，我跟同事都對佢地表示敬意，因為佢地真係乜歌都識唱，仲要係比台上嗰位更大聲地唱，就好似一部人肉60GB i-Pod再配i-Pod Hi-Fi一樣，佢地歌庫入面的仲要新舊都有齊，唯一佢地miss左import入harddisk而唔識唱的，就只有soler同衛蘭合唱的一首老牌英文歌Time After Time，反而我跟同事就即刻聞歌共唱，可想而知，而家的後生仔真係要聽多少少歌啦，唔好淨係識得Soler的"yeah~~yeah~~~"先得架!!!!

最好笑係同事"真茜小姐"，當Soler響度"yeah~~yeah~~~"的時候，佢問左一條好有趣的問題 :
茜 : 你覺唔得覺得右手面嗰個靚仔d呀?
我 : 人地孖仔黎架喎!有分別咩?
茜 : (經過約一分鐘而又好專心同認真的觀察之後)梗係唔同啦，條"界"(髮型)都唔同!!
我 : 咁妳似係鍾意條"界"多d喎，人地孖架喎!
茜 : .......唔係呢，右手面嗰個好似成熟d喎
我 : 成熟d?應該係早一兩分鐘出世架咋喎，都話人地係孖仔喇喎!!!
茜 : 唔係呢，係真係man好多喎!!
我 : ......睇show啦!!!!!

少爺Gym

剛過去的星期二同五，參加左公司攪的健身訓練班，經過埋考試，終於都可以用到公司頂樓個Gym Room(考試合格先有access right入去)，地方都算好架喇(比起現時新樓盤的Club House)，仲有駐場教練，係爭在無桑拿囉，有埋就好喇，最抵死係佢仲整兩張OSIM按摩椅響度，得閒上黎按番下都幾爽架。

但玩呢個Gym最主要的原因，除左係唔洗錢有得做Gym之外，就係真係想大隻少少，對於我呢種外貌兼骨架都係頂級model的材料，若然加少少肉感就真係一流喇，我唔係要好多嘢姐，係想手臂隻米奇老鼠可以勁少少，同埋想個胸唔洗注射PAAG都可以大番少少咁囉，睇黎係時候要落番少少苦功先得喇!!!!!

www.out-cat.com

今日睇報紙，又一單"出貓"事件，上次中學生，今次大學生，有時真係諗，乜得解救作為教學界人仕，點解可以低智到咁?咁的衰款，又點教到叻人出黎丫。

手機出貓案就認真無聊至極，出試題嗰位哥仔肯定仲停留響"水壺"，可知家陣的手機，已經唔可以叫佢做"流動電話"，只要大家反思一下(先申報利益，我都係其中一份子)，若然家陣你要轉手機型號，最在乎的係點part，相機象素?螢幕解像度?手機外型?連線速度?有無收音機?藍芽?Wi-Fi?支援軟件種類?總之所關心的無一樣嘢係同"電話"有關，大部份人手扲的嗰一部機，正統應該係叫做內附電話功能的"二合一相機"或者"通訊MP3"，但呢班教師就好明顯只覺得你班學生哥都無電腦，點會上到網丫，大大隻字咁就登兩個網址出黎，死得啦，之後仲反過黎話人地出貓係誠信有問題，又話求學不是分數，又話學生質素差，真係頂佢地唔Q順。你老闆家陣成班學生黎考試就梗係求分數啦，唔通求姻緣咩!你大大隻字寫個site出黎送分，即係成班好等錢洗的哥仔睇到枱面有成疊錢任扲，咁都唔去搶嗰d學生的質素先認真有問題啦，咁豬鏢，真係所謂見到錢都唔識執咩?再黎誠信有問題，又鬼叫你班教師淨係識教書，有鬼人理過德育教學咩，除非你真係衰到貼地嗰批啦，咁就會有人同你講下做人道理，如果唔係，咪又係讀死書，嘥氣啦!

最離譜就係話要"出貓刑事化"，講出黎嗰條友都唔驚會笑爆別人咀巴嗎?刑事化最令人所津津樂道的，就是3歲細路哥都識講"疑點利益歸於被告"，試問考評局有無人敢去執法?就算有，捉賊拿雙，有無人會響隔離廁格琴高望過去丫?見我用手機篤篤下就算出貓，可能我係肚痛到想call白車架喎!若然真係提訊，同屆學生是否可齊向該出貓學生索償?再唔係原來考生正大光明，果真肚痛非常，但教師見你蛇頭鼠眼，心中暗叫"你仲唔斷正響我手?"，一看只見兩股白肉映照，考生正"用功"之際，情難自控仰天一呻，抬頭竟是老師正俯視自己"練功"，雙方四目交投，此情此景又點會唔令勾起"斷背"之說，考生又係咪可以反告老師性騷擾?

真係好難再想像我的下一代會響一個乜嘢的教學環境下長大，一班外星人正不斷以令人難以理解的大智慧去噬食香港，所謂"一日唔死一日都有新聞聽"，但我睇卡通片話"當有黑暗的時候，就代表會有光明的出現"，咁個光明幾時先出現呀?

索嘢索着"阿檬尼"

諺語，<索嘢索着"阿檬尼">的意思係表示"有無咁橋呀?"咁解，即係好似"咁啱得咁橋，飛機撞紙鳶"之類咁，話說星期一晚同王小姐去深水埗食飯兼轉台，就俾我地撞正一個"Mrs. Bean"。

案發經過就係王小姐收工番到黎都成9點喇，咁就諗住去番我地的食堂"容記"食晚飯啦http://www.openrice.com/big5/sr2.htm?shopid=7308，呢間嘢係我同王小姐不嬲都食開的飯店，非常之好味，尤其係燒肉同埋佢地的拿手菜"小炒王"，九點半後仲全面七折添，正到爆，除左呢間之外，近的仲有"萬發小菜館"，而假日的午餐就間唔中都會去"維記"食豬潤麵http://www.openrice.com/big5/sr2.htm?shopid=3953，想做狗仔隊去呢幾處地方就實跟到我地(但跟我又幹麼呢?)。題外話唔講喇，講番嗰條"幪很"，我地諗住由而家的"3"轉投CSL的懷抱，去到個counter度，我話要帶冧把轉台，條友總共前前後後問左我4次係用緊邊個台，個情況就等如<逃學威龍>入面的曾sir係咁問周星星同黃小貴個名一樣，我地已經超頂唔順架喇，因為成9點幾勁肚餓，到選plan喇，我就揀98蚊1300分鐘，王小姐就揀68蚊800分鐘，到佢響度好努力咁填form的時候，佢無端端鬼拍後尾枕話"見你地帶冧把過台，額外送多200分鐘俾你地啦"，一聽佢咁講，我就即刻話"咁得喇，你兩個都同我選68蚊個plan"，因為1000分鐘剛剛係最適合我的用量，係800分鐘唔夠我先用1300之嘛，你加陣咁樣益我，真係佢自己攞黎衰，佢之後就有少少黑面地講左句"咁隨你地鍾意啦"，佢可能見賺plan失敗，話俾d換手機的優惠過我，佢問我而家用緊咩機，我答"V3i"，話哂都仲叫係摩記現時top model之一，無乜理由要換住，令佢再次死哂地收口乖乖填form，唔知係咪因為換佢咁耐都係得嗰兩個68蚊plan咁細的生意，佢多次犯錯，包括將我個名Kin寫成Yin，又將我同王小姐的冧把調轉哂黎填form，到最後佢終於都話ok哂攪掂哂手續，我奇怪，乜唔洗俾錢架咩?拍拍屁股就攞兩張sim card走?唔係要俾左第一個月台費先架咩?(因為我驚呢條傻大幪原來唔記得收錢，到時要我黎多轉，我真係啋你無品味啦)解釋番先知原來而家出台係唔洗再預繳首月月費架喇，臨門誤為大鄉里一劑，守唔住尾門，真失策!

其實呢個世界上，傻幪豬鏢又何止咁少呢?我就尋晚番去同媽媽食晚飯，就響番屋企樓下間"國美電器"門口，有位sales哥哥硬銷緊一部噴霧式熨斗，有位一睇就估到九成係Freedom Walker"自由行"的師拉，走黎一手攞起掛在一旁已熨得貼服的衫，問sales哥哥"呢件衫幾錢呀?"，sales哥哥答"小姐!我地係賣緊熨斗，唔係賣衫架!"，對方只好低頭以瞬步離場。我亦曾經響新城市西田百貨，有位師拉響一個賣鑊的counter，人家主題係"少油少煙包你食得健康"，但對方卻狼吞虎嚥地讚美牛扒非常入味。所以話，豬鏢週街有，睇你有無咁好彩撞正咁解架姐!

中西有別

今日閒來無事做，又未夠鐘出去飲王小姐婆婆的壽宴，就睇番幾場早前download左但未得閒睇的NBA季後賽消磨時間，球賽就固然精采緊湊啦，但期間的廣告就更加值得一睇，唔係話外國月亮份外明，而係人地真係會用個腦去諗下點樣可以catch到你嘛，好似Nike的JOGA BONITO系列，簡東拿衝入德國電視台宣揚要所有球員踢出漂亮，之後各球星各自一個廣告大玩花式睇到你班友仔如癡如醉大叫過癮，到我今日睇Apple的廣告，故事結構非常簡單，擺明串爆Windows各樣缺點，搵條肥仔扮Bill Gates，再搵另一條年青人扮後生板的Steve Jobs，就咁兩條友響度傾偈(成個系列可以響呢度http://www.apple.com/getamac/ads/睇)，若然了解電腦資訊的人，更加會覺得對話內容非常抵死，超掂!!其實仲有好多廣告係好正架，例如Toyota新車RAV6的廣告，講架車一路行，但係車廂後座的椅不斷摺合製出空間變出好多嘢出黎，大到乜Q放得入，包括一副Drum，成張桌球檯等等，而個司機就好似當睇唔到咁若無其事駕車，尤得後面放乜都好，凸顯個車廂放幾多嘢出去郊遊都得。

相反有時睇番香港中國台灣等等的廣告，好耐無乜一個佳作出黎喇，好多都係好Hard sell地狂講個產品係乜，但係其實可能你睇完轉個頭，已經唔記得係乜，都係嗰句，catch唔到人。

講番今日個主打節目"婆婆壽宴"，4點半去到"鳯城酒家"戥腳打牌，打到8點開席(當然略有斬獲，之後嗰日仲補左少少水去黃金買左條Samsung 512mb RAM益下部腦，可以upgrade到去1G RAM添)，兩席依舊係嘈到爆地食左一餐(其實我都無乜試過可以響佢地度食過一餐比較靜的飯.....)，仲終於都可以影到一張全家福添，開心的一天呀!

佛在心中

雖然早排病到PK，個喉嚨痛到爆，但係都同左王小姐的家人(亦即係上次去澳門嗰班"七小福")，一行八人響5月1號去左大嶼山食齋，至於點解要去到大嶼山咁遠食齋呢個問題，我解釋唔到，因為每一樣嘢響人的心目中都有一個代言人，正如食齋要去大嶼山，食海鮮要去鯉魚門，買老婆餅要入元朗一樣，係咪真係特別好味?可能置身響trademark當中食嘢，心理上會好味d卦，但係對於一生人只食過兩次齋的人黎講(計埋今次)，我係覺得無分別的。

呢間齋店叫"淨悟林"，響巴士總站嗰一大堆士多的一條小徑的後面，我呢亭新手真係唔識嘢，原來食齋係以人頭計收，成人承惠60大洋，小童半價，再以人數的多寡限可以叫幾多個餸，我地八條友，就可以響全部15款餸當中選叫8個，全店只賣15款，無得自創花式，整體都好好食，起碼我呢隻食肉狂徒都會對呢8個餸有食慾，都應該知道唔差啦，但係我就發覺呢間嘢都幾騎呢，一間齋店竟然會有啤酒賣，仲要係響大佛座下一間個名都改自己做"淨悟林"的齋店喎，嗰個範圍話哂都叫佛門清淨地，酒肉乃係佛門禁忌之物，我見過和尚食齋以茶佐之，除非閣下巧遇的係一位花和尚，如果唔係又可曾見過和尚食齋的時候枱上會出現"燕京啤"?若然呢間齋店係開響九龍城，我無話可說，但響大嶼山呢個清淨地(租渡假屋另有意圖者不計在內)，入得去都係想感受下佛門祥和同清幽，點解唔可以貫徹原則呢?

食完齋，入左寶蓮寺參拜，剛巧呢段時間係浴佛節，可以淨水替佛身沐浴，浴佛及參拜後，我地就轉去大澳喇，因為實在太大霧喇，大佛座下一直落到去連嗰條長樓梯都俾霧遮哂，所以上唔到去囉，但係只要佛在心中，就足夠喇。 (張相係向住大佛方向影架，但係得d霧，乜都無)




去得大澳，其實個目的不外乎都係買下d茶果、咸魚、蝦乾、蝦羔之類咁囉，因為成條街都係賣呢d嘢(誠意推介咸魚老店"順利號")，所以無乜特別，不過最慘係響大嶼山就大霧，大澳就熱到爆，基本上唔洗買咸魚架喇，因為我本身已經曬到成條咸魚咁啦，洗乜買姐!

太熱喇，大家都速速返婆婆屋企啪番幾件西瓜消暑，而當時都已經6點咁滯喇，婆婆決定唔煮飯出街食，講到食嘢，王小姐就梗係出聲叫去"萬發小菜館"啦，呢間嘢係我同王小姐經常都會去的食店，因為又近又好食丫嘛，夠鑊氣，九條友(加埋王小姐表弟)都係食左360大洋，咁抵食又好食，去邊度搵丫?

收視報告

成個幾星期無出過新文章喇，因為病囉!我同王小姐都勁感冒，響交叉感染的情況下，我同佢到今日先叫做好得七七八八，再加上近排又鬼死咁多嘢做喎，響無得公器私用底下，就連blog都無寫囉! 但係又奇怪在響呢個全無更新的blog，每日都仲keep到有收視，雖然都係小貓數隻，算係咁啦，不過家陣個病好番，會再交多幾份稿架喇，希望可以刺激下疲弱的收視啦。

(上圖就係收視報告喇，堅架，唔係excel自己砌出黎呃人架)