打邊爐

尋日同個朋友食完晏後，去左剪頭髮，間嘢響加連威老道東英大廈斜對面，叫"LOBBY"，咁我第一次去(原本同我剪嗰位大爺隻手受傷，要成兩個星期先開番工，咁我又要去整Smart ID喎，經朋友介紹就試下呢間啦)，我4點3去到，咁我響接待處話我搵阿"乜水"剪頭髮咁啦，咁佢叫我響梳化等等，ok，咁等啦，點知一等就等左3個字，期間係無一個人理過我架，我好似跌左響另一個空間咁，我透明架!!正常求其一間收你$49蚊洗剪吹嗰種Salon，個Stylist就算係剪緊第二個唔得閒，都會出黎同你打聲招呼卦?呢間嘢咁無視客人，又叫我點幫襯你呢?最抵死係當我走左的時候(仲等?梗係去第二間剪啦)，反而就識得狂打電話黎搵番我，我咁高傲，就梗係啋你都傻啦!!

成個星期都好似無乜陪過王小姐咁，見尋晚大家都得閒，就梗係一齊食番個飯先啦，咪又見好似少少凍凍地，咪去左土瓜灣"鴻福"打邊爐囉!(即係無間道阿森哥去嗰間炭爐打邊爐)
D嘢幾好食架，我地仲一個爐火鍋，一個爐就燒烤，食到我地兩兜友飽飽就走人喇，叫做補番我晏晝嗰度谷氣啦!!

長夜漫漫.......

家陣晨早流流10點幾，但係我都攰到仆街，無他，因為尋晚訓廳，最抵死的就係我唔係因為lai左嘢要俾人迫訓廳嗰種，而係因為王小姐的妹妹買傢俬加執屋攪到屋企好亂無床訓之類的原因(到呢一刻我都唔明點解買傢俬會令到自己張床亂到訓唔到???anyway, forget it啦)，令到我地屋企首度出現天外訪客。

對於我呢亭腰骨不嬲都唔好，長期響傷兵名單的球員黎講呢，訓梳化呢個高危動作，換黎的就係而家我條腰好酸痛囉.........而令人"振奮"的消息係，王小妹的櫃係要星期日先黎到(呢個係expect，not sure.......)，咁即係話，我可以有3日時間去適應呢張梳化，It's Magic!!!!!!!!

唯一叫做可幸的係，因為訓唔著，終於叫做肯開番隻停左一排的Kingdom Heart 2黎玩，又真係好Q好玩...........