我今日走火......警呀!

今日下晏，公司所有層數都要一齊玩走火警，我就覺得超無聊喇，我好質疑今次走火警的作用可以有幾大?將所有的事都用最正常的模式去做，無人扮暈，無濃烟，樣樣都正常到爆，又點會試到真章呢?成個火警演習，得個行字，由35樓行樓梯去地下，唔係話攰死呀，係焗Q死呀，又講到明其實由25樓直到地下的走火通道係入唔番去座building入面架喎，若然我就響19樓就已經焗暈想走，但係又入唔番去，頂....咁我等死得啦?之後走到去地下仲要響附近個球場度集合排隊報到count人數，呢個又係無聊至極，我真係打死都唔信，當真係火燭的時候，個個都好似正義聯盟上身咁乖乖去球場排隊，一係就無人排隊，一係就實唔啱人數，事但實中一樣架!點會咁勁齊人兼有秩序丫，真係唔知到底間管理公司響度攪乜，嘥氣。

早排同部電腦換完火牛之後，都仲未認真check過部電腦仲有無其他嘢，點知求其check下個CPU的溫度之嘛，嘩!成68度，睇黎係時候要同部腦黎個全身檢查加做個"無菌除塵"大行動先得喇，順手去睇下洗唔洗要同CPU換風扇，不過呢D咁麻煩的工序，就梗係聽日先做啦!

情陷夜中環之LV肌膚再生

早幾日終於都係我地個LV重生的日子喇，話說呢個LV袋響兩年前買，咁上年響好耐無用過而又想用番的一日，攞番出黎用的時候發現條底帶無端端好似梅菜咁樣，即場嚇死，咁就梗係攞去LV度理論啦，我咩都無攪過，又無整濕佢，點會變成咁呀!話哂呢個袋都真係唔平架喎，佢地竟然話無得整喎，總之到最後嘈到我"魚蝦蟹"都出埋都係無得攪(跨國大企業把口真係唔係一般Local企業可比，話哂我響投訴"r"著數呢方面都可以話係Master級架喇嘛，都慘敗響LV手上.......)，到最後唯有求助於坊間茅山術，即係出去攞師傅整啦(唔整就幾千銀total lost架喇......)，最後去左中環某某專修理名牌袋的舖頭度整，經過一個月搶救，終於都響24號夜晚康復出院喇，當然"住院費"都唔少嘢啦，但相比起total lost，價錢都叫合理啦。

換牛

尋日終於dick起心肝去"高登"同部腦買過隻火牛，揀黎揀去，最後選擇左呢隻Antec SP350。其實我就好想即刻裝番好佢架，因為我部腦成日都好似有"上呼吸道感染"咁，推"行"少少就響度"噓噓聲"，嘈到爆，同埋未試過玩"換牛"，好想即刻試下，不過因為要去王小姐的婆婆屋企食飯，攪到要成夜晚11點先開始整，過程順利，都唔係好複雜，家陣部腦終於都靜番哂喇!!

尋日又有去探家姐同姨甥女喇，睇住佢一路路大個，個樣都會時時刻刻咁變架喎，一星期前同一星期後又唔同樣架，好得意，不過家姐就真係辛苦喇，見到佢忙呢樣忙嗰樣，無得停，希望工人快d黎到啦，唔駛咁辛苦，努力啦!

見Preal個blog講開話整Hit Counter，早排又試下自己整一個(雖然知道呢度係人丁單薄架喇，不過我就係想睇下有幾少人丫嘛)，不過我覺得麻麻地靚，遲d先揀個靚少少的整過，仲諗住會加埋"Photo ablum"、"簽名板"同"message board"，又係嗰句，得閒就整啦!

到呢一刻，仍然俾尋晚個芒果強暴緊，肚仔痛痛，唯有打機啦又，"Final Fantasy XII"，我黎喇!!

攞證

今日約左Ger、勳同阿屎去攞"至痕身份證"，影嗰時都無乜嘢架，見到實物後，影到我成個黑鬼咁，其實個攞證程序係要響櫃枱前有個mon會show番你的個人資料(連埋相)，個職員會問"張相係咪你呀?"(咁梗係架啦，唔通會錯得咁離譜咩)，之後我地三條無聊友又響度攪爛 gag喇，響度諗點答個職員好呢?明知實係自己，但都以好肯定的語氣話"呢個唔係我"，又或者係以好疑惑咁話"個樣似...嗯...但係呢個唔係我黎喎"，到時個職員仲唔吹脹?

今日仲響葵芳買左套想買好耐的<魔神英雄傳>扭旦，早排俾人炒到飛天的佢，而家可以用一個叫做合理少少的價錢買到，算啦，鬼叫恨左咁耐咩，一套做得有誠意的扭旦，好少有架喇!

今晚王小姐無端端話想食"仙跡岩"當晚餐，反正好耐無去過，去重溫下都好呀，之後我終於都明白點解我好耐無去喇，因為真係好難食呀..........比起尋晚同佢去"老蘭"食杏花樓真係爭好遠，講開又講，"老蘭"好耐無去喇，重遊呢個舊地，發覺......真係好多女......，不過又係齋睇，鬼叫.........咩(刪二百萬字)，亦因為咁，令我尋晚發左個夢，就係發夢"好奇蹟地"可以同阿Ger阿勳出去夜蒲，嘩，仲唔有咁癲玩咁癲呀?點知個夢就咁就完左喇喎，我頂!發埋我去邊度玩點玩法玩左乜都好丫!點解要咁殘忍，現實生活無，發下夢都好丫，連個夢都無埋.......頂......

保護地球!!

"天使因美麗心中高傲，自比與神同等，失去謙卑，順服的美德，因此在神的寶座面前，不再有其榮身之處了。於是他們墮落敗壞，被神棄絕，驅逐摔倒在地上。牠們就公然與神為敵，遍地游行，引誘人遠離真神。"

係咪好奇怪我會寫一段咁的嘢呢?先旨聲明，我係無任何宗教信仰，其實呢段係節錄自http://zh.wikipedia.org/wiki/%E9%AD%94%E9%AC%BC一段關於"魔鬼"由來的釋義。呢段期間，相信全香港大部分的市民，都俾報紙密集式報導"魔鬼警察"所包圍，每一份報紙都好似識左"魔鬼"好耐咁，將佢一生所做過的每一件事都搵得番哂出黎講，到最後每一個人的結論都係"其實諗番轉頭，佢一早就已經好有問題架喇...."。
其實呢件事可以好接近自己，可能大家身邊都有一個"魔鬼文員"、"幽靈主任"、"怪獸主管"之類架，不過大家唔知，又或者可能大家無理到。天使變質，魔鬼衍生，此乃因果。但係而家大家所得到的，不論報紙定雜誌，都係用頭版去解構"魔鬼警察"的過去，但係就只係用大約兩包烟仔咁"丁屎"的版位去講解件事而家的進展.....

"模特兒案"源於"冷漠"，"魔警"源於"釋懷"，但係從來無人會去解構，反而會有人搵"屋主"做專訪，亦有人攞"魔警"的筆跡去check佢的"魔性"，......哎......咩世界呀?

希望可以快d遠離呢單咁本末倒置新聞，好厭煩........，我相信近排只有"經濟日報"先係比較正氣的報紙架喇(當然唔計"大紀元"啦.......)

睇黎呢篇嘢啱做專欄多少少，亦相信好多人會睇到"媽媽"聲，叫我"咪玩正經"之類，其實我都有"正能量"，唔係全部都係"負能量"架........

其實真係唔需要超人維護地球和平，只要都唔好制做咁多怪獸出黎就好ok架喇!

天敵

近呢幾日唔知點解，明明晚晚都耕田咁早訓，但係都係眼訓到爆，唔知關唔關近排"潮爆"的天氣所影響，(潮)濕度日日都超過90度，攪到個人"好笠"，好多想做的嘢都唔願做，淨係想沖個涼訓覺.....

家姐就仲響屋企"坐月"，成個月響屋企唔出得街，齋休息，可以好悶，不過其實又應該忙到爆，因為響呢個世界上，New Born Baby同埋幾廿歲的阿伯阿婆，就係最需要別人照顧的人種，睇黎家姐忙碌的日子都係non-stop架喇。不過王小姐尋晚食晚飯嗰時，問左我一條好無聊的問題，
王小姐 : 妳家姐成個月要響屋企唔出得街，咁落"Club House"算唔算出街呀?
我 : 咪玩啦，妳去過佢屋企N咁多次，佢屋企無Club House架喎....
王小姐 : 咁如果有呢?
我 : 妳係咪想問，妳第二時生完如果悶到爆係咪可以落街行呀?
王小姐 : 係囉，好悶架嘛，咁如果係電梯直達嗰種Club House，咪唔算出街吹風，可以去囉!
我 : 妳呢個想法好"老夫子"橋段喎.......(之後我無理佢，繼續打邊爐，食"鵝腸")
王小姐 : (咀藐藐，無癮中)

前幾日同個摯友響msn度傾偈，交流左一d同另一半的相處情況，好有共鳴，因為大家都有個固定到郁唔到的伴侶嘛!!期待住呢條"友"的返黎......

近排學緊點用VNC，因為實在有太多人叫我幫佢整呢樣整嗰樣喇，有心得的朋友可以留言交流下架!

試業完畢，正式投入服務喇!!

"有型有款遊日本"終於完成喇!如果只係想追呢個故事的朋友，唔好以為就唔洗再多留意呢個Blog喇喎，成個行程記錄的大部份片段都講左架喇，但係總有一d小節係漏左無講或者唔記得加番架，所以<"有型有款遊日本"補完計劃>亦會響未來開展架喇，大致上會加番多少少同王小姐響遊途上的點滴啦，又或者係其他嘢啦!正如金庸的小說都會出修訂版啦!!!

近日收到朋友Preal的mail，知道佢整左blog，好呀!可以將佢懷孕的經歷寫低哂，我家姐都有咁做，其實真係一個好好的紀錄黎架，成大半年同自己血脈相連的體驗，相信第二時BB或者自己睇番的時候，一定好感動架!!努力呀!!Preal!!!(不過如果王小姐生BB，我諗我會忙到連Blog都無得寫呀，因為到時大太監"小堅子"一定要貼身伺候"詠詩娘娘"架啦..........)

諗番我呢個Blog的開始，完全係為左紀錄低去日本的遊歷架咋，但係發覺原來響呢個大家各有各忙的環境之下，Blog係可以令到好多唔係經常都可以見到的朋友，都可以了解到對方的近況，係一件幾令人開心的事架，就好似響Preal的blog度，可以知道佢近排點啦，又可以link去其他我識的朋友(好似"藍毛"咁)度睇下，幾好架!另外，又可以抒發下自己的心情，有時候寫完就好似搵左個人傾偈咁，而我呢個"What can I say?"亦都試業左差唔多1個月喇，呢個名其實係我整的時候，都諗唔到應該寫乜，所以不如就改做"What can I say?"啦，家陣都run左一段日子喇，係時候要改革下，改番個貼題少少再勁少少的名，遲d會有公佈架喇!!

Family Day

今日一朝早就過去家姐屋企探BB再加family day啦，其實自從家姐生完之後見過我呢個姨甥女一次之外(仲要係未開眼添喎)，就無見過佢喇，今日終於都見到佢開眼的盧山真面目喇，好得意呀，抱上手細細舊，但係都屬於手長腳長嗰種，可能未來又係一個"高人"喇卦，而佢的喊聲(但係無眼淚，齋嗌)令我覺得好大自然呀，嗰一刻覺得生命真係好神奇，但係要我講係咩感覺，我唔識點講。

見到大家都因為呢個新成員的加入而好高興，但係家姐同姐夫就麻煩少少喇，BB永遠都係玩就過癮，湊就無癮架嘛，見到佢地個樣都feel到辛苦架，當中湊bb實左係有太多的要點同秘訣喇，回想番我出世時嗰種咁多麻煩嘢同遭遇，再加上嗰陣時的資源，我的爹媽真係要用好多"力"先可以湊到我咁q大同埋無穿無爛，就正如我經常都同王小姐講，"我呢一生人最幸運的一件事，就係可以生響呢個屋企，我咁多古怪問題，如果唔係呢個爹媽，我可能.........."，anyway，唔講呢d喇。之後又響度諗，若然係王小姐生完BB，以佢呢個響未生的時候都乜都唔做，淨係叫我做的人黎講呢，個picture係幾恐佈，相信到時就算2317 4567都未必可以幫到我喇，我同佢咁講，佢只係得戚咁講句"哈哈哈，我實乜都唔做架，咁辛苦!"，我諗到時我只好講句"oh my baby......"

今日，係愉快同溫暖的一日。

熱血最強

好攰呀!點解?尋晚又打機囉，有時候打機係可以令人唔洗諗咁多嘢，真係跳入一個虛擬世界度，只係專注響點樣過關同埋用咩方法先可以打死嗰個永遠都會好打過你的大佬，係一件減壓、開心同消磨時間的好娛樂黎架!尋晚打到3點幾訓，不過都唔係訓左好耐咋，因為逢saturday就係"王氏音樂學院"的營業時間，晨早9點就醒左喇，之後上網、睇卡通，無聊咁屈響間房度到12點零鐘，就約左d好友食飯打半個下晏"熱血籃球"，不過始終我氣管同膝頭哥的困擾，就黎要收咇咁喇，尤其係膝頭哥，真係痛到呀........

今日係朋友Kelvin Fung結婚大喜，在此祝福他倆生活愉快，衷心恭喜!!!!!

早排見news知道TV Game"Final Fantasy"入面用黎俾遊戲角色補能原"藥水Potion"會出實物，仲要係真係可以補充體力解口渴更解體渴咁話喎(報導話咪又係溝色素的"顏色水")，今日終於都見到喇，我初頭睇news嗰時都覺得幾得意想買黎display下架(因為的鍾意隻game丫嘛)，點知一見到(見吓張圖).......普通到呀.......算把啦.......好難想像點解可以出得咁無誠意.........

聽日全家去哂家姐屋企睇BB加Family Day，期待呀!!!!!

生左喇!!!!!!!!!

3月14日，我的姨甥女出世喇，好開心呀，屋企又多左一個成員喇!!

BB女的外貌暫時就似我姐夫多D，但係都要等遲下大少少就會真係知道似邊個喇，尋晚去左探家姐，佢已經好精神喇，真係好喇，而BB女就響度勁訓，都未張開眼見下爸媽同我呢個舅父仔呀!不過唔緊要啦，今個Sunday已經安排左一個家庭大聚會，到時肯定開心到爆呀!

生喇!!!!!!!!!

我家姐生喇，好期待BB女的來臨呀!去醫院探佢時，佢又比我想像中無嘢喎，我睇電視嗰係痛到阿媽都唔認得再加大叫嗰種架嘛!但係佢仲可以無乜事咁繼續食飯架喎，咁都好呀，起碼唔洗辛苦丫嘛!但係我地個個都希望BB女快d出黎啦，唔洗個阿媽響度痛嘛，幾分鐘痛一劑喎，老實真係唔知會係點痛法，不過早d出黎就總係會好d嘛!

同埋而家原來去探大肚婆的保安程序拍得住金庫，門口要登記之外，每個孕婦只限兩位探病者，多過兩位就麻煩響出面lobby等，一個出就換另一個入(好似打摔角要嗌接力嗰種咁呢!)，所以lobby的人山人海程度，就好似"美心酒家"或者"潮樓"門口等位飲茶的情況一樣囉!

照計情況，BB女應該會響今晚半夜或者聽朝就出黎架喇，快D啦，舅父等緊同妳玩架!!!!!真係好開心呀!!!!

Oh....禪

話說尋晚同王小姐出左去旺角食飯，去左鼓油街嗰間"上海翠坊小籠包"度食，真係無嘢講，成餐飯無樣嘢食係有味架，要badlist呢間嘢.........食完飯之後，行一陣當散步之後諗住返屋企啦，行下行下行左去新世紀廣場喎?(係好奇怪架，係唔會明點解行到咁遠架)

行到一半已經發覺新世紀真係一個應該要重建的地產項目囉，要選旺角最唔迫人的地方，頭三甲一定有"新世紀"，星期六夜晚竟然無人行架喎。咁行下行下，我呢個科技先鋒就諗住上去呢度間OSIM度試下部"騎馬機"啦，因為我想知佢同panasonic嗰部有咩分別丫嘛(重申本人同纖體減肥係無任何關係，只係當佢玩具咁玩姐，點睇我都未乜有地方可以纖先啦!)，點知display嗰3部都俾人玩緊喎，咁我地咪行入少少等下順便睇下有咩玩囉，就響呢一刻王小姐雙眼發光，立即試玩嗰條"郭羨妮腰帶"，即係家陣賣行哂廣告有兩隻翼的郭羨妮用緊嗰條綠色腰帶"uZAP"，其實條友好早之前已經話想買架喇，家陣俾佢試左一陣就即刻話要買喎，咁我梗係即時冷靜下佢先啦，"妳條友出名三分鐘熱度架喎，我包妳番去震兩日就話唔玩"、"妳個friend咪話有條架嘛?問佢借黎玩下，若然妳覺得真係會長玩先買都未遲啦!"之類的說話我就梗係盡出啦，其實當其時d店員真係好似賣緊跌打藥咁，成日響度大叫"仲淨8條"，賣左一條之後又大叫"仲淨7條"，大佬，賣魚咩，你唔嗌埋"平d俾你，賣完收檔喇!"

好彩，王小姐亦都俾我的說話提醒左，諗住冷靜下坐響梳化度諗下買唔買的時候，OSIM又點會要你齋坐咁dry呢?當坐響張梳化度的同時你腳下其實就已經有部"美腿魔師 iSqueez"響度招呼妳啦，咁我就梗係去玩下部"騎馬機"，得個4個mode，只不過係速度唔同，但係角度不變的轉動，一d都唔好玩，咁我就番去諗住接埋王小姐走頭啦，而王小姐亦都明白佢實會玩兩玩又唔玩架喇，諗住算數走架喇，點知佢話其實部"iSqueez"真係幾舒服喎(我老早響個朋友屋企試過啦，可能我腳大卦，我覺得好夾住，一d都唔舒服)，就響呢個時候，頭先serivce開我地嗰位sales妹妹經過(佢招呼緊第二個喇已經)懶係好不經意咁同王小姐講"如果買uZAP，iSqueez有八折喎!"，唔講尤自可，王小姐諗都唔洗諗就問我"妳家姐買唔買uZAP呀，不如妳問下佢丫?"，我心諗又點會咁橋真係會買丫，咁咪幫佢問下囉，點知........又真係俾佢同我家姐夾得成，結果，原本由買uZAP，變左買iSqueez，OSIM係真係無改錯名架，oh.........禪.........

順道推介大家尋晚自己煲左一套好片，"霍元甲"，李連杰打得同演得都好出色，好睇!!

另外，因為我的另一blog"有型有款遊日本"可能係code的出錯，所以要搬番黎呢個祖家"What can I say?"度住番一排先，但等遲d攪得番掂先再搬番出去，當然，大結局"2月11日"梗係仲響度制作中啦!!!

有型有款遊日本(06年2月11日)

Last Day喇!!因為我地係搭晏晝3點3飛機，又要預番去機場的時間，響呢段咁短的時間入面，可以做d乜丫?咪就係點都要買d手信返黎俾下人囉，買手信，澳門就話去鉅記買杏仁餅姐，日本就梗係去上野買嘢食啦!

由於之前一晚都差唔多pack好哂行李，咁我地起身check out埋就可以直接坐車去上野喇，咁d行李點算?梗係放響上野駅的Locker度啦，因為太多嘢喇，我地要用成3個價值¥800的Locker先裝得哂我地的行李，之後我就委派左王小姐做手信專員，叫佢幫我執一埋黎啦，我自己就去左行呢間叫做"Yamashiroya"玩具店啦(網址係http://www.e-yamashiroya.com/)，呢間樓高7層的玩具店，都算乜Q都有咁，不過相比起秋葉原的玩具店，呢度就好似香港的"反斗城"或者"TOYC"咁，而秋葉原就係"皆旺"或者"太原街"，品種無得比較，有睇開玩具的朋友就會知上述兩種唔同類型的店舖會有咩分別，不過響呢度都買左好多嘢，都好滿足喇!!

同王小姐會合番之後，黎左日本5日咁耐，都未曾食過一碗拉麵，就求其去左附近一間拉麵店度食，ok好食啦，點都會好食過"味千"囉，食完之後，王小姐仲帶我行左上野的市集一個圈，好多嘢賣架都，成條花園街咁，即係嗰種當你睇緊一檔賣緊乾貨的舖頭，隔離舖其實係賣緊波鞋架喎，而對面間舖呢，又會響度賣緊急凍海鮮，成個市集你係唔會定到位到底呢個area係賣乜架!不過，d長腳蟹真係好平囉，我隻手咁長的3條都不過係¥2000-¥5000不等，為番最貴都係300零蚊，3條我隻手咁長喎，你試下去"魚一丁"度叫丫，半條都收你3舊啦!!仲有好多海產架都，包括粗到成2碌電燈柱咁的八爪魚鬚，多不勝數，咁當然，呢度最大型的舖頭，梗係呢度賣手信的龍頭大哥"二目之菓子"啦(人多程度相等於澳門鉅記，自己諗下啦)!!

係時候要同日本講bye bye喇，攞番d行李，坐番火車去機場，因為我地的時間實在係太趕喇，基本上一搵完Boarding Pass之後就要上機咁滯，最後仲響機場度見到"比卡超飛機"，真係幾靚架，不過平時佢飛到上天咁高，其實鬼睇到咩，所以都唔明，點解要油到咁靚把鬼!!

經過幾日的行程之後，我同王小姐都真係好攰，日行夜行，毅行者都要休息下啦，何況仲要係一個攞住shopping bag的毅行者!一個開心的旅程，就咁就玩完喇，返到黎香港，又要向現實低頭，起身返工喇..........

相片重溫http://community.webshots.com/user/jasonwking

有型有款遊日本(06年2月10日)

上回講到醉仙(我)同王小姐返到酒店，但係有記性的讀者都記得，王小姐響原宿街頭咪見到有個途人扲住個GARCIA MARQUEZ GAUCHE的紙袋嘛!其實佢真係未死心架!就響呢一日，佢就開始佢的行動喇.......

今日的計劃行程係去淺草寺，富士電視台同埋去行GardenWalk outlet，三處位於都ok遠的地方，時間上係好緊密架，但係我地兩個實在太攰喇，所以.....係訓過龍架，我地成10點半先起身，攪呢攪路都成11點幾先出到發。但係王小姐已經響去車站途中一間便利店，買左本"Non-no"，佢話通常呢本嘢都有介紹GARCIA MARQUEZ GAUCHE的袋架喎，咁佢就沿途響車上面不斷睇，咁我就必然係無理佢，尤得佢啦!

第一站係去淺草寺，影下嗰個"雷門"燈籠咁囉，其實無理由咁多day都係買嘢行街shopping架嘛?就正如頭先咁講，咁晏先起身，又點會有食早餐丫!咪響淺草寺前的市集，買左一包"人形燒"食，所謂的"人形燒"，其實咪即係唔同形狀的豆沙餅之嘛.......，咁我地就響呢個淺草寺度影下相參觀下，順手買下手信(少少)咁囉，因為係呢度嗰d日本娃娃公仔先會寫住"淺草寺"、"雷門"之類咁話喎(王小姐稱)......，但係我亦都唔執輸，去左一間"犬印鞄制作所"度睇嘢，呢間嘢所賣的全部都係尼龍帆布袋，想知多d可以去呢個網址度http://www.inujirushi.net/研究下，個款我好鍾意，有得即場刻名亦係我想要的嘢，但係奈何佢d尼龍帆布的質感同我上網睇書之後心目中expect嗰種真係差老連咁多，佢唔係唔好，但係唔啱我想要嗰種類型囉.........，正諗住行完離開淺草，王小姐無端端話仲有個地方想去，之後就"隊"本旅遊書黎話要去"呢度"(佢真係當我好似導遊咁架)，我一睇，我啋，原來係去睇一間賣"七味粉"的舖頭，無端端去睇七味粉?Anyway，都係去左，都總叫做開下眼界，因為原來七味粉係唔止七味架，呢間專門店係可以將每一種味分開黎賣等你自己溝鍾意的味架喎，仲有d裝七味粉的樽，竟然係可以為番港紙成二百幾蚊，心諗....有咩咁特別呀?

遊覧完淺草，就再坐車去台場參觀"富士電視台"喇，去過的人都知，就梗係坐無人駕駛列車去架啦，沿途仲可以睇下"彩虹橋"、海濱沙灘同埋富士電視台個"波波"(即係球型博覽館)，正當我地響度睇緊風景的時候，向下一望，嘩!有怪獸呀!就響電視台都幾遠吓一個空曠的公園，一班著哂緊身而d顏色sharp到勁騎呢的怪獸兵團(好明顯係"雜兵"，唔係大佬輩，因為個個一樣樣!)響度拍緊戲喎，以前睇電視就睇得多喇，實地睇點拍就真係未見過，可惜未見到係邊一個超人丫......(因為我無睇開呢亭超人片，有睇開的朋友可以留意下到底係邊一套，班"雜兵"d衫主要係以黃同紫為主色架!)。

黎到電視台喇，就梗係入去"波波"度睇啦，響買飛嗰度仲有套講長毛象紀錄電影，不過要俾錢睇，咁就梗係啋佢都傻啦，要睇長毛象，我不如遲d睇ICE AGE 2好過啦!入到去"波波"，其實都係例行動作，影下相睇下d風景同佈景咁囉，最正係可以影到同睇到好多我最愛動畫"One Piece"的嘢丫嘛!不過又咁講，其實夜晚黎呢度可能會靚d，因為話哂都叫居高臨下(響個"波波"度)睇夜景，再加埋"彩虹橋"的燈飾，都應該幾正架!(雖然我未睇，但係睇過d相又確然正d架，未著燈的"彩虹橋"，又有邊一忽可以話係佢係"彩虹"呢?)，不過我地時間所限，算把啦!

離開電視台，王小姐就話要去台場的Venus Fort度睇下，其實呢個地方係一個商場，不過個天花板係整到好似個天空咁，再加一d懶歐陸色的裝修咁，無乜特別架，地點係響台場個摩天輪隔離，順手就梗係影埋摩天輪啦!照咁睇，響台場要做的都做齊喇，可以走喇，起程去最後一站的Garden Walk Outlet喇!

就響呢段由台場坐車去Garden Walk Outlet的途中，王小姐終於都黎料喇，因為真係俾佢響本Non-no搵到嗰個GARCIA MARQUEZ GAUCHE，咁佢搵得咁辛苦，就梗係死話要去啦，最弊就係佢淨係識搵，但係又唔識點去喎，雖然本書入面有shop list，但係佢鬼識睇咩!經過我的一輪研究，終於都破解到日本地址嗰種"界豆腐"式的方法，發現呢個品牌的專門店，就響原宿，無錯，王小姐之前亦係響原宿的街頭見到有條茂利扲住個紙袋，無得講啦，焗去.......

好喇!黎到Garden Walk，因為我同王小姐的品味實在係各走極端，所以決定左分頭行事，自己去睇鍾意的嘢，咁我梗係第一時間去Nike先啦，真係有好多好平的鞋，我睇中左一對Nike白波鞋，響香港D-mop賣成千銀一對，但係呢度就不過係600零蚊，等陣間問埋王小姐意見無問題就即刻扑鎚買架喇!(因為若然唔問下佢呢，買左之後佢又會串到爆咁話"乜靚咩?，麻麻地姐!"之類的說話，仲要係每著一次都仲會再串你一次嗰種)，之後過對面的Edwin度睇老牛啦，入到去間舖的corner位度，一圑人(約5-6個啦)的其中一位女子，以流利廣東話響度講"呢條褲幾靚丫!"之類的說話，響日本無端端有人講廣東話?咁就好正常睇下係乜水啦，睇條女好似好熟面口咁，響度諗緊係咪識的同時，因為佢地實在太阻住喇，幾條友竟然可以霸哂一間舖的corner，我根本就入唔到去，我最怕就係同人迫同埋爭嘢玩，所以就過左去Adidas度睇嘢，我亦諗起條女係乜水喇，係"盧淑儀"呀，即係李克勤的老婆呀，咁李克勤亦都當然響度啦!咁我第一時間打俾王小姐問佢影唔影相啦，點知佢的答案真係令我really shock，佢叫我"我睇緊嘢呀，我唔過黎喇，但係你同佢影相丫，影完俾我睇番丫!"咁我唯有照辦啦!之後我就返左去Edwin睇下李克勤走左未(亦因為Adidas的嘢不論款式同價錢同香港都無分別，所以速閃啦)，咁佢果然未走喎，我走埋去完成我的使命啦，問佢"可唔可以影張相呀?"，咁佢好冷淡咁答句"好呀"，之後就影左張相喇，實情佢的面口亦都黑黑地，再加上我亦唔係太鍾意佢啦，所以都無乜特別。不過話時話，我去過兩次日本，兩次都撞見歌星架喎，上次(2000年)就響一間玩具店度見到古巨基(當時佢應該無人俾歌佢唱而響大陸浮沉緊的"還珠格格"時代)。講番Garden Walk，行埋呢度間franc franc之後，咁我就帶埋王小姐去Nike度睇番我想買嗰對鞋啦，佢竟然覺得對鞋都靚喎!(難得品味一致)，咁我諗住買啦，點知佢話"家陣仲係新年喎，未過正月，買鞋?衰一年喎!".......大佬，你講到咁毒，我仲點買呀!

離開Garden Walk，就去嗰個臨時加插的地方，原宿GARCIA MARQUEZ GAUCHE，由於當時響原宿飅已經係7點8喇，正常日本大部份舖頭都收8點，咁得番咁少時間，又唔係好firm間舖個位置的時候，我地決定左.......坐的士，傳說日本的士係好Q貴，無錯，個傳說係真的，個距離其實好似係旺角先達去到家樂商場咁短短的距離，竟然係收你為番港紙50幾蚊!不過又真係另一種體驗囉，人家部的士有哂GPS，響部TV度篤番個地址落去，就會成條路線點行標哂出黎(目的地仲有枝賽車終點旗響度fing下fing下)，咁起碼無得好似香港d大師傅咁扮唔識路響度兜路呃錢先啦!但係咪開心住，因為間舖原來響一處車行唔到的斜路之上，所以我地一落車就即刻跑去間舖度，好好彩，終於成為左當晚最後一個顧客(因為我地一入到去就由OPEN變左CLOSE喇!)，咁王小姐咁遠道而來，又點會空手而回丫，梗係袋fing fing咁走啦!!!(對呢個品牌有興趣的朋友，間舖就響新開嗰個"表參道廣場"的後面一條斜路度，誠意推介呢間舖........入面一位鬼鬼地sales，正，又好傾，無得頂呀!)。

行左咁多街，又係要醫肚喇，是日晚餐係吉列豬扒，響新宿TIME SQUARE 14樓的"名代"度食，叫左兩個set，仲加多個吉列小食，我地仲揀埋肉質超正的"桃園豬"，真係好鬆化，d醬汁又好味，而白飯同面豉湯仲有得無限復活(任添)，正呀!!!!

相片重溫http://community.webshots.com/user/jasonwking

有型有款遊日本(06年2月9日)

玩完成日廸士尼，攰到嘔泡，但係都第3日啦，又點會唔輪到王小姐的購物團正式開始丫!全day都係Shopping, Shopping and Shopping....

第一站係去涉谷，我都講過好多次啦，攰丫嘛，所以我地晏左起身，梳洗埋都成10點幾喇，酒店早餐無得食，就直頭坐車去涉谷食啦，不過都係食老麥咋喎，因為王小姐睇中左日本老麥一個用炸蝦做的漢堡飽，就去試下啦，ok好食啦。食飽就梗係行街啦，王小姐就走重遊舊公司GAP，我就去左adidas度睇嘢，之後就四圍行下，諗住去BEAM度睇下嘢啦，點Q知涉谷原本開左的5間唔同的BEAM SHOP，一次過執哂，問你死未?到左呢個地步，涉谷都不再係一個久留之地，行埋去老連咁遠的Buberry之後，走都走唔切咁，我地就去坐車去代官山喇!

坐車黎到代官山，梗係狂買正嘢啦，去到adidas 'style'度，王小姐就立即買左件恨左好耐的adidas的長身褸，我就正響度睇緊嘢的同時，無端端佢響度狂嗌我喎，心諗佢係咪又想問我"你覺得呢件好睇d定嗰件好睇d"之類的無聊問題時，原來係俾佢發現到我心愛的已故graffit大師-Keith Haring的T裇，咁就梗係唔洗講嘢就買啦，開心到爆，因為香港無得賣架喇!之後就梗係去埋APC同埋Porter啦，我見到有個Porter袋，boxer款，代官山限定，¥15620，照睇牌面係咪覺得必買無疑呢?但係點解又會無買呀?因為佢大大個字寫住"予約受付中"，頂!要訂喎.....我真係超鍾意架，難為王小姐仲響度操流利風涼話"好靚咩?咪又係袋一個，我覺得無乜特別咋喎!都唔靚!!......"，再去埋APC，成千蚊港紙一對普通到爆的白飯魚，大佬，唔好咁呃錢啦好嘛! 行完時裝，又輪到王小姐玩復古喇，去左代官山的"Mr. Friendly Store"，我嗰個Generation，又點會唔知Mr. Friendly係乜丫，佢響"Mr. Friendly Store"又再次滿載而歸咁走喇，到左呢個時候，晏晝2點幾喇喎，過去原宿把啦!

黎到原宿，必先經過成條好似女人街咁的直路，先可以正式踏足"裏原宿"，咁當然，人係總要食少少嘢架嘛，我地去買左嗰間成日都懶多人的pancake度買左個吞拿魚pancake，再去橫巷入面一間炸薯餅店買個唔知咩料的炸薯餅，就繼續行程喇，我再次使出奸計，叫佢去原宿一橦專賣女裝的商場度睇嘢，咁我梗係話"呢個女人地我實悶到爆架喎，不如咁啦，妳自己行住先，我去裏原宿行下，妳行完就打俾我，我即刻番黎接妳"，奸計果然得逞，咁我就bang一聲就衝入裏原宿啦，其實響呢幾日咁凍的天氣底下，由第一日開始我已經成日響度講"我想買頂笠住個頭同對耳的帽呀!!!"，但係行緊都睇唔啱款.....好在，響Stussy見到一款我好鍾意，咁王小姐又咁啱行完喇，咪問下佢意見囉，點知佢竟然話"你戴左之後，好似賊佬要去打劫咁喎!"，聽到呢個評語，我....頂.....唔住喇，唯有唔買囉，之後又去行埋Levi's同埋Dior，咁見到有玩具賣的KIDDY LAND，我又點會唔入去行個圈呢?就響呢個時候，王小姐的瞳孔突然放大數倍，原來係佢見到迎頭行過黎的一位女仕手拎一個大紙袋，個牌子正係佢最鍾意的GARCIA MARQUEZ GAUCHE，但係因為旅遊書都無講呢個牌子邊度有，所以無得去，但係我知道，佢係唔會咁易就收手架.......

行完原宿，就輪到新宿喇，王小姐一個箭步就去左"伊勢丹"度行喇，奈何我要扲住一袋二袋，我就去左Sakula行下啦，始終高科技同玩具先係我的最愛嘛!!王小姐花左大約個零鐘響"伊勢丹"之後，都係時候又黎個Dinner喇，今餐我地係揀左食壽司放題，間嘢叫"築地玉壽司"，d魚生又真係好鬼死新鮮囉，好正，但係我就俾d清酒差d攪掂左，因為王小姐嗰份.........我飲埋。

飽餐一頓，王小姐就湊住我呢個醉仙番去喇(但係所有購物袋仍然係我扲架，好難理解架!)，但係響途中，其實成街都係酒鬼，我地包括見到有個醉左的中坑同個廣告燈箱打車輪啦(當然個廣告張相係有個靚女啦)，同埋有個阿伯醉到當我地以為佢踎低響度休息下咁架姐，點之佢一企起身就原來條褲都未著好(即係個人企響度，但係條西褲響腳眼咁囉，咁當然，佢有著底褲....)，所以我仲可以扲住咁多個購物袋，響嗰度算係正常嗰批黎架喇!!!

相片重溫http://community.webshots.com/user/jasonwking

有型有款遊日本(06年2月8日)

正所謂"去廸士尼做足準備".......係去香港嗰個先要架姐，就算你攞住張飛行到去個門口度都未知自己入唔入得，就正如廸士尼話齋"It's Magic!"。但係東京呢個，就無出現呢d問題喇，乖乖交出¥5500，攪掂。

我地兩條友轉左兩程車(無想像中咁遠添)就去到廸士尼喇，我地仲諗住反正坐Disneyland Resort Line(廸士尼列車)每人都不過¥220，試下佢啦(雖則明知好近)，咁一落地鉄諗住去坐喇喎，見全車人都向同一個方向(右)行，無死啦，實無錯，點知原來全部都係選擇用腳行去(約5-10分鐘路程)，我呢兩隻羊就咁跟左呢班羊群徒步行左去廸士尼，無得坐Resort Line喇!(到走時先知原來坐車係行左邊.........)

一入到樂園，嘩!成班卡通人物響哂度俾你影相喎，好老實講，真係好似一入到去就走左一個好開心的世界咁，"It's Magic!!"，咁我地就梗係狂影啦，但係就響呢個時候先醒起，王小姐佢以前響法國廸士尼買左本專俾班卡通人物簽名的簿，佢自己去香港廸士尼都有帶架，點知今次唔記得帶喎，咪唯有用張Guide Book簽囉。當我地同d卡通人物追逐完之後，就終於開始正式進入樂園玩喇!!

一入到樂園，寄過一條滿佈要搾乾你荷包的商店街之後，"明日世界"已經響我地的右手面喇，不過一入場時已經貼左告示，"巴斯光年歷險之旅"、"Big Thunder Mountain"同埋"米奇老鼠歷險屋"都要做improvement工程，所以無得玩"巴斯死光"喇......，唯有去睇套立体電影，之後王小姐就要求小弟同佢去玩"飛越太空山"，我同佢講"我心中只有一座斷背山，又何來太空山呢?再加上同我一齊咁耐，妳無理由叫一個重來唔玩機動遊戲，去海洋公園都只會睇魚的我去玩呢d咁刺激的玩意架?"，就係咁，王小姐就自己就左去玩佢的太空山，而我就自己響個樂園搵"我心中的斷背山"--亦即係四圍去瀏覽日本妹，就響我沉醉於呢個咁美好的環境之際，聽到遠處好嘈，咁就梗係去睇下啦，原來係公主花車巡遊，因為東京廸士尼響2月攪緊個"Princess Day"，成個月都以公主為題材，呢個公主花車巡遊的節目，就係將凡係"女"的卡通人物都響架心型花車度出場，又確係幾靚架，響呢個moment，我要爆喇，見到咁多"女"，我就立即舉起.........部相機影相啦，而王小姐就因為飛左去太空山的關係，錯失左呢個節目喇!

王小姐由太空山降落番黎地球之後，我同佢就決定去一賭自己的運氣，因為"Princess Day"的重頭戲，"灰姑娘加冕后冠儀式"有得抽入場券，抽中會成為呢個儀式的"嘉賓"，有得響"灰姑娘城堡"正前方坐定定咁睇，如果唔係就要，就要做番普通"平民"，響外圍企住咁圍觀，我地兩條友就咁就去左個抽獎counter度，有個assistant就會笑哂口咁將我地兩個將Daypass隊入去，個screen之後又會懶cute咁抽一輪獎，到最後，佢就講"congratulation!!"，原來我地真係中左喎，正!!有得去睇，時間係20:10!!

就咁我地就響個樂園度影下相呀，玩呀咁，之後去快餐店買左個Lunch box，千零yen，有個米老鼠/唐老鴨的手提箱裝住食物(咪又係漢堡飽薯條汽水嗰d囉)，大家留心下d相我扲住嗰兩個就係喇，之後就做番陣丐幫，席地就咁響度等睇Parade，好精采，我覺得好睇過公主花車，起碼d卡通人物叫做生鬼好多。睇完Parade，就梗係繼續行程，出發去睇其他設施啦，推介"Winnie the Pooh Hunny Hunt"同埋"小飛俠歷險屋"，真係正!!睇下錶，5點3，又夠鐘睇另一個show喇，叫"Minnie!Oh!Minnie!"，簡單黎講即係Minnie Mouse同其他卡通人物(神秘嘉賓係Mickey)響度吹下歌跳下舞咁囉，亦都係一個good show，就係咁，天，亦開始黑喇，我，亦有d攰喇(因為實在係好q凍，係凍到我同佢要間唔中衝入d商店度吸下暖氣先可以頂得住嗰種!)，唔係為左等個"灰姑娘"，我諗我會選擇走架喇，但係王小姐的精力旺盛到好似啱啱起身咁，就咁我地又玩多幾個設施，但係都係d輕巧嘢囉，例如坐下船探險森林之類咁，唔多洗我郁嗰種。再睇錶，7點10喇喎，我話不如去定城堡先啦，影下相都好呀!(其實劃哂位又洗乜咁早去丫，我扮嘢之嘛!)，攰呀大佬.........

儀式正式開始，先先係廸士尼世界入面所有的couple都由城堡行出黎祝賀(即係米奇配米尼，雪姑配王子之類啦，但係奇怪就係高飛狗同"大鼻與鋼牙"竟然係一pair....)，之後灰姑娘坐住馬車出場喇，佢地一齊響度唱歌跳舞一番之後，國王要為灰姑娘加冕喇，就響加冕完成後，全部卡通人物一齊望向城堡，煙花盛放，灰姑娘同王子就坐住馬車繞場一週，接受市民的祝福.......

睇完呢個最後的show，得番4-5個字，梗係要去商舖買嘢啦，響一輪瘋狂的搜購之後(我兩個係行到有職員跟住我地以表示"我地收舖喇，睇完未呀?"咁架!)，我地正式步出樂園，東京廸士尼之旅，完成!!! 之後我地兩個帶住超疲累的身軀，坐番車去新宿一間鐵板燒居酒屋食飯，好鬼死好味呀!尤其係"玉子燒"，仲叫左兩隻大元貝，上級牛，炒面，食飽喇，走啦，好攰呀，返去訓喇!!

相片重溫http://community.webshots.com/user/jasonwking

有型有款遊日本(06年2月7日)

因為實在有太多人問我地日本做過d乜呀?好唔好玩呀?你響邊度撞見李克勤呀?之類的問題，反正今日腰痛無心工作，不如一次過寫哂出黎俾人睇，好過逐次出去講啦!!

嗰日一朝早就梗係天都未光齊就已經坐巴士入機場呢d公式嘢就無謂講多啦，坐9點3港龍機出發，2點(當地時間)就走到日本喇，好在有聽我家姐講，老死都渣實件雨絨，因為一出機場就已經凍到"o雪o雪"聲，就響呢個時候我同王小姐黎左個暖身活動，話說坐"京城電鉄"由成田機場去到池袋JR駅之後，王小姐就開始以"龜速"的步伐行去酒店，咁以我地呢亭心急人黎講就梗係睇唔過眼要出聲啦，就同佢邊行邊黎起鑊整番一碟"小吵"暖身，咁當然，我亦都一如往績俾人響1分鐘內連珠炮發閃電KO啦........

響Sunshine City Prince Hotel攪掂哂check in，都成差唔多5點幾6點喇(可想而知行得幾慢呢......)，正式重遊呢個我成5/6年前黎過的舊地喇，第一站就梗係要去下秋葉原睇下我心愛的高科技玩意/電玩之類的嘢啦，原本想搵套魔神英雄傳扭旦，但係我頂!週度都無，但係就搵到隻剛出無耐"勇者王Final"，價值不過係16000yen，正想買之際，第一發覺個盒都好殘下，仲要得番呢一盒，到最後都係放棄，秋葉原此行空手而回。

到左呢個時候，就梗係要食個Dinner補充下体力啦，之後番左去池袋食"Shabu Shabu"，但係途中俾王小姐見到有間BEAM JAPAN喎，佢呢位走在時代最頂端的女仕又點會放過呢間嘢呢?就梗係入去打個白鴿轉先啦，原本我同佢都想買件comme des garcon的衫架，圍番港紙先係嗰300幾銀，但係佢得白色(我地想買黑囉)，同埋淨係得"PLAY"及"有眼心型"呢兩款俾老翻發揚光大的print，所以都係算把啦。到達目的地"池袋牧場"，由於我地二人又唔識日文，就梗係要搵番本英文menu啦，點知自稱英語好掂的王小姐竟然唔太了解menu入面兩種唔同的鍋的意思(都唔知係本menu的問題定係佢的問題?)，咁我梗係一盡導遊的責任，叫個侍應黎解釋下啦，我亦都好有心機咁同個侍應去到交流(因為佢都ok正架.....)，最後揀左用水同豉油溝個湯底再加落個平底鍋度食的方式，又真係好食到爆架喎，我地兩條友響90分鐘的放題入面，食到飽到爆咁滯走。

沿途返酒店的路程上，經過咁多機舖，我呢個電玩人又點會唔入去參觀下呢?王小姐就自必然去夾下公仔啦，但係以佢的玩遊戲資歷黎講(最後一次打機係玩"超任"的孖宝兄弟....)，又點會夾到丫......，行過少少，見到有間嘢賣燒墨魚丸的舖頭叫"爆彈丸"，粒丸成個拳頭咁大，咪又買一個試下囉(頭先又話飽到爆........)，之後去Family Mart(便利店)買d零食嘢飲就番酒店宵夜再訓覺喇.......因為第二日要早起身去廸士尼丫嘛!!!!!

相片重溫http://community.webshots.com/user/jasonwking

重要通知!!!

為左我呢個"What can I say?"的Blog可以整齊d，我決定將早前公佈過的"日本の旅"重新放響另一個Blog度，等讀者可以舒服d咁一氣呵成咁睇哂佢，為左隆重其事，梗係要改個好名俾佢啦!綜合番坊間好多旅遊書的書名，好多都係改到見到都覺得好玩咁架喇，例如"聲色犬馬東南亞"、"悠遊遊歐洲"之類咁，咁我去日本丫嘛，當然係以日本為名啦，候選名單包括:

1號 : 去日本，帶現款 (無錢去黎"托"咩)
2號 : 無皇管，逛日本 (因為我地係自由行嘛)
3號 : 有型有款遊日本 (日本咁多靚嘢，就梗係有型有款啦!)

到最後的勝出者，當然係"有型有款遊日本"(勝出原因好明顯，心水清的朋友一定知點解......)，其實響候選名單當中仲有好多唔關事的名出現左，不過唔啱用咁解架姐，例如:"渣住碌竹去曼谷"、"搏大霧，北海道"同埋"係咁嗌，遊杜拜"之類啦........有興趣重溫我同王小姐響日本所見所聞的朋友，可以click去以下呢一個網址度瀏覽http://kinkin-adventure.blogspot.com/，或者響呢個Blog右手面LINKS嗰度有得揀，不過唔知係咪Cookies的問題(係電腦嗰種Cookies，唔係唱歌嗰班)，可能會show唔到個site，大家可以試下清左cookies應該睇到架喇，若然有問題可以留comments俾我(試過覺得點，記得話我知喎.......)。

今集節目時間又差唔多喇，順便提提大家，呢個Kin Kin Adventure仲有大結局"2月11日 - 日本の旅"係未公佈架，密切留意出版日期!!!下集再見!!

好痛呀!!!!

今日放左 1 day病假，因為牙痛，其實上個星期就開始架喇，不過仲忍到，咪當無嘢囉，點知尋晚開始就唔乸掂喇，真係痛到呀.....，仲攪到頭痛添，去睇醫生啦，咁阿醫生就話"你牙肉發炎，腫左喎!哪，返去食消炎藥，開d溂口水俾你........"之類咁的說話啦，但係到我家陣返到屋企，睇一睇張醫生紙，嘩!我的病因係"URI，上呼吸道感染"，當場吹脹，佢連我個肺都無聽過，又點知道我條呼吸道邊一處有感染呢?好明顯，自從"沙士"之後，香港好多醫生都將URI呢樣嘢普及化，有理無理都係URI.....URI.....URI

在途中的時候，見到好多阿姑"打小人"，仲要係大規模嗰種，睇番日曆，今日原來係"驚蟄"，成條東京街大坑渠都係D阿姑響度打呀打，仲有OL響度跟隊添。我就覺得奇怪喇，點解仲會有呢類咁的活動架呢?求籤、問卜、作福之類的活動，我覺得無問題架，因為係自求多福，唔影響到人架嘛!假設，正當你響街口搵何二姑打陳主任呢個小人的時候，反過黎陳主任其實又響另一條街搵阿李二妹去打你呢個小人，咁成個世界的怨念咁重到烏雲蓋頂囉?又何苦呢?咁得閒去打小人，不如諗下點樣遠離小人，又或者點樣可以自強而唔俾小人整到，唔係來得更實際嗎?

3年之後又3年.........

尋日，3月3號，就響3年前，我同王小姐........一齊左喇。

咁講得係紀念日，點都要賀一賀佢啦，王小姐仲懶有心咁送左份禮物俾我添，就係買左部電話俾我喎，係Motorola的V3i ，因為我早前同佢講過我部E1000壞Q左丫嘛(但其實整番好架喇，不過部機真係好有問題，一年都唔夠就要我整3次.......)，咁佢就話買過部俾我，咁我話用呢部咪無得3G囉?之後王小姐就話"我好似無同妳玩3G好耐喇喎，乜仲有人同你玩咩?"其實自從佢換左部O2 mini之後，我的3G只係提供有限度的服務架咋(齋for睇新聞.....)，但係其實唔通我有同其他人玩3G，我又要話俾妳聽咩?哈哈!!!

尋晚實要出去食下飯啦!去左朗豪坊的The Basil度食，普通泰國嘢姐，唔係特別好食，我地相信香辣屋會好食好多。食完飯行左一陣就去睇戲喇，睇<天生一對>，其實劇情係好架，但係我覺得楊千嬅做唔到嗰種對個病對自己個種失望出黎，我相信張栢芝做可能會好好多(就好似佢做"忘不了"嗰種無左個男人之後重頭黎過爬番起身嗰種)，致於任賢齊就更加無謂提啦!又係一套劇情好但選角老土的戲囉!

順帶一提，日本之旅的手記係未完架，2月10號同11號正積極制作中(我真係好忙架!)，有留意的朋友就記得追埋嗰兩集大結局呀!