上下層

早前的星期日，王小姐肚痛大作，由下晏5點痛到夜晚10點，仲不停肚痾，見佢痛到面青口唇白，訓響張床度悲鳴，再加上佢曾有因腸胃問題痛到暈低的紀錄，梗係立即同佢衝去浸會睇醫生啦!!

一去到姑娘見佢好似死咁滯就已經立即出動輪椅俾佢坐，之後等左一陣(因為佢有發燒，呢期興玩禽流感，仲唔快快俾佢睇咩!)就俾佢睇，經同醫生討論，發覺原來係之前一晚食左個「泰式生蝦刺身」所以中招，呢d咪叫做抵死囉，之前暈低響九龍城嗰次又係衰響「泰式生蝦刺身」手上，叫左佢唔好食架啦，領嘢啦!! 我太心軟喇，決定以後都唔可以再俾佢食呢亭嘢架喇!!!!

最奇遇的就係，過兩日先知原來好友Ken & Preal就響樓上產房剛生完囡囡幾日咋，早知嗰日順手上樓上探下佢地啦(不過要照顧我個大囡囡，又點會分到身上去丫，不過尋晚去左探佢地，下一篇再講...)

一頓晚飯

差不多半個月無出品任何文章，係因為太忙太累無時間，精神同肉體的能量每日都只係得可憐的40-50%，但係偶然的一晚，王小姐為表溫柔一面，突然玩煮飯..........

雖然佢所識的餸菜唔會好多兼偏向西化，但經我略為提點，都叫做有少少成績啦(其實以前佢都煮過好多次飯架喇，不過係近呢一年多佢太忙，所以停產多時........)，起碼唔會好似「美女廚房」嗰d咁誇張，一定食得飽同好味!!

至於餸菜方面，有 : 美極煎大蝦、蒸魚、即買即食煙鴨胸，而忽然想飲「白湯」的我再叫佢加多個「忌廉湯」黎飲下，雖然佢真係要落手落腳整的餸只不過係美極煎大蝦同蒸魚，仲要係毫無難度嗰種，但係食飯除左食物的美味之外，煮的人有心就已經可以令到餐飯多一份味道，一份所有食譜裡都永遠都唔會記載的溫情之味。

感謝她經過忙碌的工作後，衫都未換就煮的這一頓飯，好味!!

Click入片段精華 -->> 煎蝦、「叮」湯

四方會談

報紙教女仕們響世界盃期間點做「好女友」，但就係無教男仕們如何響呢段精神肉體抗戰期，如何為自己叉番兩格電去睇精彩賽事呢!!

今屆世界盃個期真係撞到應一應，適逢我要攪那超重大Project，日頭夜晚都係咁睇書上網搵資料，再唔係就同兩邊屋企人好似開會咁傾詳情，台客老友又返港一星期要聚舊，加上我的「青年渴睡症」日益嚴重，但係賽事就好似食葯咁每日三場(晚上9點12點3點)，晏到不堪的我隻眼已經好dry兼眼訓，食完lunch想訓覺但係"把"響枱度又點好訓架，以前響舊公司返夜班期間，將4張椅排成一列好似露宿者訓公園的絶技(唔好以為好容易呀，當你試過離地平臥響4張有轆的椅度又唔驚跌同保持平衡，就知有一定技巧同難度架喇)，日光日白公司咁多人又點好意思表演呢! 響呢個時候，OSIM的偉大魔力終於都發揮出黎喇，因為公司的Health Club度有兩張OSIM iDesire按摩椅，食完飯第一時間就如曬咸魚般訓番個靚覺，一邊按摩一邊訓，差唔多夠鐘就起身開工，叫做好少少咁啦....

近日都不斷響度睇場地，打電話問詳情咁，問各人意見，好忙，在四方人仕的理念要找到一個平衡點，並唔係想像中咁容易，王小姐又超忙兼夜收工，變左好多時我都要獨擔大旗，再等佢返黎研究，之後又要再諮詢兩大董事局，程序仲煩過罷免陳水扁，再加上我體內的躁狂DNA，情緒指數絶對比近期恒生指數有更大波幅，面對住呢個大Porject，我就竟然有點緊張失措，制作一個令各人滿意的婚禮，就是一件不簡單的事...

發現伊甸園

為左做好我同王小姐的人生新一頁，一個偉大的希望工程，總需要一個場地嚟進行見證程序，咁樣我地先可以「合法」架嘛，而自從唔知邊月邊日開始，再唔一定要響註冊處註冊之後，婚禮服務公司就開始cap水啦，而暫時攪得比較多人用的，就係我地今日所去的「伊甸園婚禮服務公司」http://www.hkmcs.com.hk/c-venue.html。

我對於呢間嘢都唔算太陌生，因為響未有呢種服務之前，其實佢只不過係我響灣仔食過的一間可以望到海景的餐廳，但係自從有証婚服務之後，佢就響幾個地方開左個hall，咁我地以前因為去過灣仔個site食過飯，大約估到個環境係點，咁今日就去左中環聖約翰大廈睇下係乜傢伙啦(其實即係全港第一單自訂場地証婚，連新聞都有賣嗰間囉!!)

中午去到中環，坐小巴上去聖約翰大廈啦，因為我以前響St. John學過急救，但係以防萬一都叫小巴哥哥到聖約翰就叫我落車啦，去到之後赫然發現全幢嘢真係攞黎玩急救，無一個地方似係用黎結婚，我又唔記得帶間嘢個電話響身，打1083又話無「伊甸園」的登記，嗰時又笠又熱喎，我響度@%$#@%緊的時候，王小姐就梗係發下「盧蘇」，諗住當事敗行番落山算啦，行到一半落大雨喎，我話不如坐車走啦，但王小姐就睬我都有品味地照行，就響一分鐘後，反而咁就搵到真正的目的地「聖約翰大廈」(原來我地去錯「聖約翰總部」，之後仲俾人串「頭先嗰度乜係聖約翰大廈咩?」，超.....我鬼知中環咁多聖約翰咩!) 。

到達目的地，已經見到樓下大堂有對新人響度，超多人，咁我地上到去6樓參觀，一出Lift又係勁多人，入到個場度，實際環境係比睇相更靚，全白色好Pure，有一大兩小Hall，細Hall就真係好似一個課室大少少，大Hall就大好多喇，以我地的觀禮人數黎講都應該夠坐，而等候區的格局無乜特別，比起註冊處就叫做多番少少佈置咁囉。




大Hall








兩細Hall門前











新娘房










等候區



睇相係咪覺得好靚呢? 但若然我地唔係揀呢一日去睇，可能都會俾呢個咁美好的畫面所蒙蔽，就好似D人撞正落雨去睇樓先發現間屋漏水咁，因為除非用大Hall，如果唔係嗰兩個細Hall就好似迫左少少囉，同埋最大問題係如果係好日子(好似呢一日咁)，就會有三對新人的親朋戚友響哂同一個Common Area(等候區)度，變左仲迫過女人街(相中的等候區係我地等人潮全部入哂場咁滯先影的)，唔同政府嗰d咁全個等候區都係自己人，最怕到時有人向我道賀「恭喜哂你地今日大日子喎!」(通常都唔會叫對方個名架唔知點解)，咁我當然會好有禮貎咁「我多謝你黎就真!」，握手五秒後，雙方一頓先發現「你係.........sorry，攪錯左，不過都恭喜哂!!」，咁就無謂啦......

但係無辦法啦，鬼叫我地想嗰個日子係公眾假期，政府唔辦公咩，所以都好有可能要響呢度攪，又或者直頭搵律師去擺酒嗰度攪，再唔係就等到7月19號，佢地另一個響新世界中心的新場地又會開張，到時再去睇下會唔會好過呢度好多囉!!

人生一個非常重大的Project，真係好多嘢煩同好多嘢攪。仲要撞正呢排世界盃，日頭係咁搵結婚資料，夜晚又要同朋友睇下波(最衰係有個"台客"老友返黎，總要去Gather一陣)，又要搵時間同雙方家人傾進度，結婚其實唔係什麼「戀愛的墳墓」，相反應該係「戀愛的里程碑」，但反過來，是「精神與體力的墳墓」才對吧! 努力啦!!黃小堅!!

好易中，好易買餐餸?

D人成日話「香港勝在有ICAC .....深圳勝在有PAAG」，但我就認為「香港勝在有六合彩」喇，大家不難發現每逢大時大節，例如新年、復活節、端午、中秋、聖誕之類，你可能會唔記得要返屋企做節或者如何歡渡佳節，但你就一定會記得去投注站買金多寶，佳節時份人口密度最高唔係蘭桂芳，應該係投注站至真。

其實六合彩對社會的意義係非常之重大，佢係香港人的夢，一個付出同收獲不成正比的奢想，佢的奧妙正正在於每隔幾期就會有人中左頭二三獎，所以呢個橫財夢就好似像遠還近，而又唔係捉都捉唔到咁，當你一注5蚊，一星期攪珠3次，一年52星期，一年只需780蚊，你就可以發足一年橫財夢喇；試諗下如果香港無左六合彩，香港人少左呢條可望發達的宣洩渠道，大家響佳節前夕無得再跟同事夾份投注揚言「中左即刻走」，你再無機會諗中左3800萬之後點樣買豪宅跑車兼環遊世界，你的生活會就少左一點歡樂，所以大家響投注時，其實係背負住一個夢，一個可能捉得住的夢。

點解我會咁講呢，因為我就響尋晚中左六合彩，雖然唔係話頭二三獎，但話哂都叫四獎，中左4個半字，派彩4800元，都OK啦，用番我上面條公式計，我足足番左六年本，亦可以話免費再發橫財夢六年喎，比起以前間唔時中下3個字之類，今次真係好開心架，以前間唔時賭下波嗰種贏錢，話哂都叫做有少少計算同分析嘛，但今次中六合彩就純粹係自己好運喎(我不大相信什麼六合彩有路捉的說法，因為若然真係有得捉，報紙對於六合彩所謂的貼士就會好似出波經馬經咁，一份份咁黎啦，洗好似而家咁得嗰一條煙咁大的版位咩)，同埋雖然係4個字加特別號碼，但話哂我張飛得六個冧把我中左五個喎，希望下一期可以再中多d錢就好喇!!!