近排我個Blog似專欄多過似日誌，為怕悶親大家，講番個生活小記俾大家聽下啦。
話說王小姐早前已經係咁扭話要去睇「周慧敏演唱會」架喇，咁又見咁耐無乜睇過演唱會，而周慧敏又好似收山咁(雖然退出可以復出，復出後又可以退出咁，但係都無法啦.....)，就去左買飛睇啦，尋晚就一如以往地所採取買「即場飛」政策，因為我地多年都係咁買飛法，而每次都可以成功買到最少頭十行，甚至乎第一二行都試過添，從未試過空手而回，好過晨早打去信用咭訂飛打到天黑先打通啦，仲要唔知幾多行嘢位置.....，而我今次就6點半去到紅館個counter度諗住買飛.....
我 : 想買今晚周慧敏，400蚊
售票阿姐 : 無喇喎，400同300得番單丁位，200先有連位
當時我心諗仆街喇，唔通老貓燒鬚無得睇? 就響呢個時候，一位「鬼鬼鼠鼠食蕃薯」的師奶就響離我4個身位細細聲咁叫我....
鬼鼠人 : 你係咪要飛呀?我有喎!
我 : .........
其實當時個環境好特殊，畫面就好似電影橋段，街口樓梯有個阿姐向個阿叔拋媚眼，個阿叔想上又唔想上嗰種咁，但到最後，個阿叔梗係有上啦....
我 : 妳有飛呀?我想要400喎，咩段數咩行數先 (好在以前有去下大陸，先有嗰種識途老馬feel)
鬼鼠人 : 400，梗有啦(攞張飛出黎話俾我聽係邊段邊行，仲帶埋我去counter個setting plan度指俾我睇我坐邊添)
我 : 咁幾錢先? (明知係黃牛，梗係問清楚價錢啦)
鬼鼠人 : 就原價400蚊之嘛!
其實響同一時間，話哂都叫做緊d好似唔見得光的嘢，我緊係四圍望下有無嘢風吹草動啦，鬼知陣間會唔會好似電影橋段咁，一接張飛就跑幾十個CID出黎制服我，又或者有班Bunny Girl走出黎話係電視台偷拍叫我講感受，咁就樣衰啦，但我所見到的反而係另一個世界，我當時應該係活響「大白鯊」的劇情入面，因為當「鬼鼠人」同我對緊座位，我見到附近已經有幾條個神態同「鬼鼠人」非常相似而又都係帶住個小腰包的茂利，眼甘甘咁望實我地，就好似我地如果談判失敗的話，就會再有另一條游埋黎咁，個畫面真係相當抵死架! 而我都費事再攪咁多嘢喇，第9行，算係咁啦，一手交錢一手交貨，過程簡單，但係之後唔過3分鐘我擰番轉頭望，就已經唔見左個「鬼鼠人」喇，當時其實我都心諗「阿婆走得快，一定有古怪」，張飛會唔會係假架?(唔係三國演義個「張飛」，I mean "the ticket")，票面係用Master Card買架喎，會唔會其實係一張失飛，而當時人又補領番，咁我張飛咪無效囉?(凡所有以VISA同MASTER買的飛，不論係演唱會定戲飛，若然唔見左，係可以用張Card去Counter補領的，所以有時雖然用Card買飛要收手續費，但真係有個保障嘛)，但係我都唔理得咁多喇，應該唔會咁黑仔卦?
咁我同王小姐響「都會廣場」食完飯(原來而家響呢度大部份餐廳食飯只要有演唱會飛，都會有9折架喎)，就響我地沿天橋行去紅館準備入場，我見到地下有兩張飛喎，仲要係未"meet"的飛喎，王小姐第一時間就梗係叫我執起睇下係咩日子第幾行啦，睇過係當日的200蚊飛，廿零行，王小姐見無Jetso就叫我放番響地(因為呢套飛係用VISA買，鑑於上文的原因，費事麻煩，如果係用Cash買，第一時間搵朋友飛的士黎睇益下人都好啦)，但我一來費事俾人以為我亂拋垃圾，二來正義感突然勁澎湃，我就攞番套飛去紅館個售票處話有人唔見飛等下有無人黎認領啦，點知個職員可能未見過有人會攞番去咁，好愕然咁講左句「唔......得架喇」，唔通香港真係無人會做番d應該要做的事喇咩?
講番演唱會，當晚嘉賓有林子祥、林隆漩、邰正宵、黃凱芹、古巨基，表演得最精彩都算係林子祥喇，真係有明星嗰種明星風範兼壓場feel，同周慧敏合唱"Sometime when we touch"超正，再獨唱「分分鐘需要你」又好好聽，咁其他嘉賓都有水準，不過拍埋林子祥就真係爭好遠喇；演唱會rundown係周慧敏獨唱一首，嘉賓合唱一首，嘉賓再獨唱一首(周慧敏換衫)，大部份人的廁所位竟然係響林隆漩獨唱期間，可能佢響香港知名度唔高啦，但係若然係我，梗係響邰正宵嗰時先去啦，林隆漩一定好聽過佢先嘛；主角周慧敏就真係正喇，話哂人家都差不多四張嘢，雖然佢無再好似後生嗰時咁「唧」個胸出黎，但係個樣都仲keep得好好，嗰種斯文賢淑女人feel又出哂黎，唱歌方面其實佢又真係無乜金曲囉，咪又係「天荒愛未老」、「感情的分禮」同埋「自作多情」嗰幾味，但上一代的玉女的確係好過而家嗰d明星妹好多啦，，話之影到妳同d男人攬埋一舊或者擔住枝煙響度爆粗都好，總之身份証寫住係Female的都話係玉女，認真吹脹。
今晚除左滿足左王小姐勁想睇周慧敏的心願之外，我又何嘗唔係回味番以前迷偶像嗰種feel，試問響90年代頭的青春男生，有邊一個無迷過周慧敏同埋楊采妮? (情迷葉玉卿的色慾少年除外......)，同王小姐黎左個會後檢討，都係發覺女人唔keep好易無，之後有呢一段對話.....
我 : 佢真係幾正呀呵
王小姐 : 係呀，你講到佢咁正，我諗我都要留番長頭髮先得
我 : (少少側目)我一早叫妳留長髮架啦，係妳自己成日抗旨走去攪花臣之嘛，若然妳到人家個年紀都仲係咁正，我到時咪無籍口去「沙沙滾」囉
王小姐 : (反擊性的高音語調)你可以要我唔駛做，印印腳養生，咁我實有咁正架!
我 : 都話妳唔識計數架啦，若然我一早可以要妳唔駛做，我晨早就可以「沙沙滾」啦，洗啋妳咩，哈哈!!
王小姐 : .......你都痴線架.......
沒有留言:
發佈留言